Kenya: Leta yataye muri yombi abarimu 6 bashinjwa kwigisha abanyeshuri ubusambanyi
Abarimu batandatu bo mu ishuri ribanza mu Burengerazuba bwa Kenya, batawe muri yombi na Polisi nyuma yo kugaragara mu mashusho bahagarikiye abanyeshuri, bigana abakora imibonano mpuzabitsina.
Leta ya Kenya yatangaje ko yataye muri yombi abarimu bagera kuri batandatu, aba barimu bose barashinjwa kwigisha ingeso z’ubusambanyi abanyeshuri bari bashinzwe kwigisha amasomo asanzwe.
Ibinyamakuru byo muri Kenya bivuga ko abo barimu bo mu gace ka Nyamache, bafashwe nyuma y’uko amashusho akwirakwijwe ku mbuga nkoranyambaga, bikarakaza abaturage.
Ayo mashusho agaragaza abo banyeshuri bari munsi y’igiti, bamwe baryamye hejuru y’abandi nk’abari gukora imibonano mpuzabitsina. Muri ayo mashusho harimo abarimu bamwe bari guseka, bafite inkoni mu ntoki.
Polisi ivuga ko ibyakozwe n’abo barimu ari ukwigisha abana ingeso mbi.
