Police yahaye gasopo abica amabwiriza yo kwirinda covid-19 bitwaje amadini n’imyemerere.

Polisi y’u Rwanda yihanangirije bamwe mu baturage bica amabwiriza yo kwirinda coronavirus bitwaje idini n’imyemere.

Nyuma y’aho humvikanye amajwi ya bamwe mu baturage bo mu Karere ka Ruhango bavuga ko badashobora kwambara agapfukamunwa cyangwa birirwe bakaraba nk’amwe mu mabwiriza yatanzwe na Leta mu rwego rwo kwirinda ubwandu n’ikwirakwizwa ry’icyorezo cya Coronavirus, polisi y’u Rwanda yatangaje ko itazigera yihanganira abaturage nk’abo badashaka kubahiriza amabwiriza yatanzwe na Leta.

Mu kiganiro yagiranye na Radio y’igihugu kuri iki cyumweru taliki ya 10 Mutarama 2020, Umuvugizi wa Polisi y’u Rwanda CP Jean Bosco KABERA yabahaye gasopo agira ati:”...Ntibishoboka ko umuntu yakwitwaza imyemerere cyangwa idini ngo yice amabwiriza Leta yatanze yo kwirinda icyorezo cya Covid-19, icyo ni ikibazo rusange kireba buri muturage wese, uwo tuzafata ntituzamwihanganira na gato, azahanwa kimwe n’abandi tutitaye ku myemerere ye...”

CP Jean Bosco Kabera yakomeje avuga ko uwumva adashobora kwambara agapfukamunwa, cyangwa ngo abe yakubahiriza andi mabwiriza yo kwirinda coronavirus yaguma mu rugo aho kuza kwanduza abandi no gukwirakwiza coronavirus.