Rwanda: Abantu 4 mu barwayi 102 ba Covid-19 bamaze gusezererwa mu bitaro nyuma gukira ubwo burwayi

Bamwe mu barwayi ba Coronavirus mu Rwanda bamaze gutaha nyuma y’uko ibizami bigaragaje ko bamaze gukira ubwandu bwa Covid-19

Ministeri y’ubuzima mu Rwanda imaze gutangaza ko bane mu barwayi 102 ba Covid-19 bari barwariye mu kigo nderabuzima cya Kanyinya mu Karere ka Nyarugenge bamaze gukira ubu bakaba bamaze no gutaha mu ngo zabo. Mu babashije kuvugana n’itangazamakuru bavuze ko bashimiye Imana yo yabarinze kino cyorezo, bagashimira Leta, abaganga ndetse n’abandi bose babafashije mu bihe bibi bari barimo.

Ministeri y’ubuzima yavuze ko muri abo bantu bane bose batashye kuri iki cyumweru, umwe muri bo ari Umurundi mu gihe abandi batatu bo ari Abanyarwanda. Kubijyanye n’umuhinde wafashwe ku ikubitiro uko we amerewe kuri ubu, DR NAHAYO ERNEST uyobora ikigo nderabuzima cya Kanyinya, yavuze ko we akirwaye kubera ko ibizamini bya vuba aherutse gufatirwa bigaragaza ko agifitemo ubwandu ariko hakaba hari ikizere ko ejo cyangwa ejo bundi nawe ashobora kuba yakize agataha. Ministeri yavuze ko aba bantu bane bamaze gukira, basabwe kwishyira mu kato k’iminsi 14 mu ngo zabo, bagakurikiza amabwiriza n’ubundi yatanzwe ku bandi bantu bose.

Kugeza kuri iki gicamunsi cya none kucyumweru, abarwayi ba Covid-19 baragera kuri 98.