Amezi atatu ashize yashegeshe cyane ubukungu bw’Isi muri rusange ariko ku baherwe b’abanyamerika batunze za miliyari z’amadolari ntabwo ari ko bimeze kuko umutungo wabo wiyongereyeho miliyari $565 kuva kuwa 18 Werurwe 2020.
Amezi atatu ashize yashegeshe cyane ubukungu bw’Isi muri rusange ariko ku baherwe b’abanyamerika batunze za miliyari z’amadolari ntabwo ari ko bimeze kuko umutungo wabo wiyongereyeho miliyari $565 kuva kuwa 18 Werurwe 2020.
Raporo yatangajwe kuri uyu wa Kane n’Ikigo gikora inyigo kuri za politiki zitandukanye, yagaragaje ko ubutunzi rusange bw’abaherwe batunze za miliyari bwageze kuri miliyari 3500 z’amadolari, bukaba bwariyongereyeho 19% kuva icyorezo cya Coronavirus cyatangira.
Umuherwe Jeff Bezos washinze Amazon, ikigo gifatwa nk’isoko rya mbere ryo kuri internet, umutungo we wiyongereyeho miliyari 36.2 z’amadolari kuva kuwa 18 Werurwe 2020.
Kuzamuka k’ubutunzi bw’abaherwe kwatewe no kuzahura isoko ry’imari n’imigabane, aho agaciro k’imigabane y’ibigo byabo yazamutse cyane. Urugero ni aho imigabane y’ikigo cya Facebook mu mpera za Gicurasi yari imaze kuzamukaho 60% mu gihe cy’amezi abiri gusa.
Muri rusange ibigo by’ikoranabuhanga nibyo byungutse cyane. Umutungo wa Mark Zuckerberg, washinze akaba anayobora Facebook, wiyongereyeho miliyari 30.1$ kuva tariki 18 Werurwe.
Ibindi bigo by’ikoranabuhanga byazamutse cyane mu butunzi mu mezi atatu harimo Tesla (TSLA), Umuyobozi wayo Elon Musk, abashinze Google ari bo; Sergey Brin na Larry Page ndetse n’uwahoze ari umuyobozi wa Microsoft (MSFT) Steve Ballmer, bose bazamutseho miliyari 13$ cyangwa kuzamura kuva muri Werurwe.
Nubwo ariko abaherwe bakomeje kongera ubutunzi, abanyamerika miliyoni 43 bagizweho ingaruka na Coronavirus batakaza akazi.
Forbes iherutse gutangaza ko mu baherwe 25 ba mbere ku Isi, nta n’umwe ubukungu bwe bwasubijwe inyuma na COVID-19. Jeff Bezos ayoboye urutonde rw’abaherwe ku Isi na miliyari 146,9 z’amadorali, akurikirwa na Bill Gates, Bernard Arnault, Mark Zuckerberg, Warren Buffett n’abandi.
Uko abaherwe 14 b’abanyamerika bazamutse mu butunzi mu gihe cya Coronavirus
Jeff Bezos yiyongereyeho miliyari $36.2
Mark Zuckerberg yiyongereyeho miliyari $30.1
Elon Musk yiyongereyeho miliyari $14.1
Sergey Brin yiyongereyeho miliyari $13.9
Larry Page yiyongereyeho miliyari $13.7
Steve Ballmer yiyongereyeho miliyari $13.3
MacKenzie Bezos yiyongereyeho miliyari $12.6
Michael Bloomberg yiyongereyeho miliyari $12.1
Bill Gates yiyongereyeho miliyari $11.8
Phil Knight yiyongereyeho miliyari $11.6
Larry Ellison yiyongereyeho miliyari $8.5
Warren Buffett yiyongereyeho miliyari $7.7
Michael Dell yiyongereyeho miliyari $7.6
Sheldon Adelson yiyongereyeho miliyari $6.1
