Umnyamabanga mukuru wa Loni Bwana Guterres kuri uyu wa gatandatu byitezwe ko azitabira inama iganira ku mutekano muri DRC
Ibiro by’Umunyamabanga mukuru wa ONU byatangaje ko kuwa gatandatu azitabira inama “yo ku rwego rwo hejuru” ku mahoro n’umutekano muri DR Congo no mu karere irimo kubera i Bujumbura.
António Guterres azerekeza i Bujumbura kuwa gatanu aturutse mu ruzinduko i Nairobi muri Kenya, maze yitabire iyo nama ku mutekano wa DR Congo izaba kuwa gatandatu.
Iyo nama y’iminsi itanu iratangira none kuwa kabiri, isuzuma ibyagezweho n’inama yindi nk’iyi ihagarikiwe na ONU yabaye muri Gashyantare (2) 2013 i Addis Ababa muri Ethiopia, ahasinywe amasezerano agamije kurandura imitwe yitwaje intwaro muri DR Congo.
Inama yo mu 2013 yari ihereye ku kibazo cy’umutwe wa M23 cyari giherutse kurangizwa ku ngufu z’ingabo za ONU zifatanyije n’iz’ibihugu nka Tanzania na Africa y’Epfo, humvikanywe uko bakwiye kurangiza ikibazo cy’imitwe yose yatezaga umutekano mucye mu burasirazuba bwa DR Congo.
Imyaka 10 nyuma yaho, muri ako gace harabarwa imitwe yitwaje intwaro irenga 100, M23 yongeye kugarukana imbaraga n’ubwo ubu hashize hafi amezi abiri isubiye inyuma ikava aho yari yarafashe ndetse hari agahenge.
Inzobere ziburira ko ako gahenge gashobora kutaramba kandi M23 ivuga ko itazashyira intwaro hasi mu gihe leta itemeye kuganira nayo mu buryo butaziguye. Ibyo leta ya Kinshasa yavuze ko bidashoboka.
Inama y’i Bujumbura irasuzuma kandi ibyagezweho n’amasezerano yo kugarura amahoro ya Luanda na Nairobi.
Kuwa gatandatu António Guterres azahura na Perezida Evariste Ndayishimiye hamwe n’abandi bategetsi b’ibihugu by’akarere k’ibiyaga bigari bazaba bari i Bujumbura baganire ku ishyirwa mu bikorwa ry’ayo masezerano, nk’uko ibiro bye bibitangaza.
Ingabo z’ibihugu by’akarere zoherejwe muri DR Congo ziragenzura ibice byari bifitwe na M23 mu gihe harimo gushakwa igisubizo cya politike.
Inama irimo kubera i Bujumbura ni iyindi yo ku rwego rwo hejuru yo muri uwo muhate, yitabiriwe kandi n’ibihugu byo mu majyepfo ya Africa nka Angola, Africa y’Epfo, Mozambique, Malawi na Zambia.
(Src:BBC)
