Umunyamabanga wa Leta Zunze Ubumwe za Amerika, Marco Rubio, yatangaje ko intambara igihugu cye kirwana na Iran ishobora kuba idashyigikiwe na benshi, ariko ko ari ngombwa kugira ngo bahagarike umugambi w’iki gihugu wo gukora intwaro za kirimbuzi, avuga ko ari ikibazo gikomeye ku mutekano mpuzamahanga.
Rubio yabigarutseho ku Cyumweru, tariki ya 8 Ugushyingo 2026, ubwo yagiranaga ikiganiro n’abanyamakuru ku birindiro by’ingabo z’Amerika bya Homestead Air Reserve Base, muri Leta ya Florida, mbere yo kwerekeza mu Bufaransa mu nama y’abaminisitiri b’ububanyi n’amahanga bo mu bihugu bigize itsinda rya G7.
Yavuze ko Perezida Donald Trump yafashe icyemezo cyo guhangana n’ibyo yise iterabwoba rikomeye ryaturukaga muri Iran, cyane cyane ku bijyanye n’icyifuzo cy’iki gihugu cyo kugira intwaro za kirimbuzi.
Rubio yagize ati: “Perezida yahanganye n’ikibazo gikomeye ku mutekano w’igihugu cyacu. Gufata icyemezo nk’icyo ntibivuze ko kigomba kuba gikunzwe na bose, ariko hari igihe biba ari ngombwa.”
Yakomeje avuga ko hari ibyemezo abayobozi b’ibihugu bagomba gufata kugira ngo barengere umutekano w’ibihugu byabo, kabone n’ubwo bitaba bishyigikiwe n’abaturage bose.
More Read
Ibi Rubio yabitangaje mu gihe ubuyobozi bwa Donald Trump bukomeje kunengwa kubera intambara na Iran, cyane cyane nyuma y’uko Ishyaka ry’Abarepubulikani ritsinzwe bikomeye mu matora aheruka yo hagati mu manda ya Perezida (Midterm Elections).
Ibyavuye muri ayo matora byatumye Ishyaka ry’Abademokarate ryegukana ubwiganze muri Kongere ya Amerika, ibintu byafashwe nk’ikimenyetso cy’uko hari abatavuga rumwe n’ubuyobozi bwa Trump n’ibyemezo bwafashe.
More Read
Bimwe mu byagize uruhare muri uko kutishimira ubuyobozi bwa Trump ni intambara na Iran, izamuka ry’ibiciro by’ingufu ndetse n’ingaruka byagize ku bukungu n’imibereho y’Abanyamerika.
Ibyo kandi byagaragaye mu magambo ya Visi Perezida JD Vance, wagaragaje ko intambara na Iran yagize uruhare mu gutsindwa kw’Abarepubulikani muri ayo matora.
Gusa Rubio yirinze kugira icyo atangaza ku buryo butaziguye kuri ibyo birego, ahubwo ashimangira ko icyemezo cya Trump cyari kigamije gukumira ikibazo gikomeye cy’umutekano.
Na Perezida Trump ubwe yavuze ko aticuza kuba yarafashe icyemezo cyo kujya mu ntambara na Iran, ndetse avuga ko n’iyo yaba asubiye inyuma mu mateka, atazahindura icyo cyemezo.
