Ikipe zihagarariye u Rwanda mu irushanwa nyafurika ry’amakipe yabaye aya mbere iwayo muri Volleyball, zatsinzwe umukino wabo wa mbere muri iyi mikino iri kubera mu gihugu cya Misiri.
Iri rushanwa ryatangiye kuri iki cyumweru, ryari kwitabirwa n’amakipe atatu yo mu Rwanda arimo Gisagara VC yatwaye igikombe, wongeyeho APR VC na Police VC zari ziyandikishije muri ino mikino yakiriwe n’ikipe ya Al Ahly yo mu Misiri.
Bitunguranye, ikipe ya APR VC ntabwo yajyanye n’abandi mu Misiri, aho bivugwa ko nubwo bari barishyuye amafaranga yo kwitabira iri rushanwa, byarangiye badashoboye kubona ibindi byari butume bitabira iri rushanwa rihuza abitwaye neza kuri uyu mugabane.
Kuri uyu wa gatandatu, tombola yasize ikipe ya Police VC yisanze mu itsinda C hamwe na Kenya Ports Authority (Kenya), Green Buffaloes Volleyball Club (Zambia), University of Zimbabwe Wolves Club (Zimbabwe) na Volleyball Club Garde ya Congo Kinshasa.
Indi kipe ya Gisagara na yo ihagarariye u Rwanda yo ikaba igomba guhatana na Port Autonome De Douala (Cameroon, Rukinzo Volleyball Club (Burundi), Asw Blida Sport ville de Blida (Algeria), Prisons Volleyball Club (Kenya) 🇰🇪 na Volleyball Club Espoir yo muri Congo Kinshasa.
Mu mikino yatangiye amatsinda ikipe ya Gisagara yakuye umwanya wa gatatu mu irushanwa nk’iri yaherukaga kwitabira, yatsinzwe na Asw Blida Sport ville de Blida Seti 3-1 (25-18, 16-25, 24-24, 15-25) mu gihe Police yitabiriye iyi mikino ku nshuro ya mbere yo yatsinzwe na Kenya Ports Seti 3-1(17-25,25-23, 21-25 na 20-25).
Imikino ikaba iri bukomeze kuri uyu wa mbere tariki 15 Mata 2024 aho ikipe ya Police VC izaba ihatana na Green Buffaloes yo mu gihugu cya Zambia.
