Minisitiri w’Ububanyi n’Amahanga n’Ubutwererane w’u Rwanda, Amb. Olivier Jean Patrick Nduhungirehe, yagiranye ibiganiro na mugenzi we wa Tanzania, Mahmoud Thabit Kombo, byibanze ku gushimangira umubano usanzwe hagati y’ibihugu byombi no guteza imbere ubufatanye mu nzego zitandukanye zihuriweho n’inyungu.
Ibi biganiro byabereye i New York muri Leta Zunze Ubumwe za Amerika mu Inteko Rusange ya 81 y’Umuryango w’Abibumbye (UNGA81), ihurije hamwe abayobozi n’abadipolomate baturutse hirya no hino ku Isi.
Mu butumwa bwatangajwe na Minisiteri y’Ububanyi n’Amahanga y’u Rwanda, bwagaragaje ko aba bayobozi bombi baganiriye ku buryo bwo kurushaho guteza imbere umubano hagati y’u Rwanda na Tanzania, ndetse banarebera hamwe amahirwe yo kwagura ubufatanye mu nzego zifitiye akamaro abaturage b’ibihugu byombi.
U Rwanda na Tanzania bisanzwe bifitanye umubano mwiza ushingiye ku bufatanye mu by’ubukungu, ubucuruzi, ibikorwa remezo, ubwikorezi ndetse n’ibindi bikorwa bigamije guteza imbere imibereho y’abaturage b’ibihugu byombi.
Ibiganiro hagati ya Minisitiri Nduhungirehe na Mahmoud Thabit Kombo byabaye mu gihe ibihugu byo mu Muryango wa Afurika y’Iburasirazuba (EAC) bikomeje gushimangira ubufatanye mu rwego rwo kwihutisha iterambere ry’akarere no guteza imbere ubucuruzi bwambukiranya imipaka.
More Read
Abakurikiranira hafi politiki y’akarere bagaragaza ko umubano hagati y’u Rwanda na Tanzania wakomeje gutera imbere mu myaka yashize, aho ibihugu byombi byakomeje gukorana mu mishinga itandukanye y’iterambere ndetse no mu bikorwa byo kwimakaza amahoro, umutekano n’ubufatanye bw’akarere. (Src:MINAFET)
