Ministre w’intebe wa Etiyopiya yavuze ko hari abarwanyi b’abanyamahanga bari gufasha umutwe wa TPLF mu mirwano ya vuba ahangaha.
Muri ino minsi igihugu cya Etiyopiya kiri mu ntambara itacyoroheye aho kiri kurwana bikomeye n’umutwe wa TPLF (Tigray People’s Liberation Front), bikaba bivugwa ko uyu mutwe umaze kwigarurira uduce tubiri twegereye umurwa mukuru Addis Abeba.
Ministre w’intebe w’intebe w’icyo gihugu Bwana Ahmed Abiy, yavuze ko hari ibihugu by’amahanga biri gufasha bano barwanyi ba TPLF.
Ibi yabivuze mu ijambo yagejeje ku bayobozi bo hejuru muri Leta ya Ethiopia ryanyuze kuri televiziyo ku nshuro ya mbere avugiye kuri televiziyo nyuma y’ibyatangajwe ko imijyi ya Dessie na Kombolcha yafashwe n’inyeshyamba.
Yavuze ko “abarwanyi batari Abanya-Ethiopia bagize uruhare” mu mirwano iherutse kubera mu nkengero z’iyo mijyi ibiri.
Bwana Abiy ntiyeruye ngo avuge neza ibyo bihugu by’amahanga cyangwa ngo avuge aho bakomoka cyangwa ngo atange gihamya, Abiy yagize ati: “Hari abazungu n’abirabura barwanye ku ruhande rwa TPLF [Tigray People’s Liberation Front] barapfa“.
Bwana Abiy yavuze ko ubusabe bwa leta ye bwo mu mezi macye ashize bwuko abaturage bashoboye bafasha igisirikare kurwana n’inyeshyamba butateguwe neza, nubwo hari umubare munini w’urubyiruko wabwitabiriye.
Akomoza ku kuba imirwano ikomeje, Bwana Abiy yagize ati: “Ingamba [urugamba] zishobora kugenda nabi bitewe n’impamvu zitandukanye ariko ku mpera igihugu kizatsinda intambara”.
Yashinje inyeshyamba zo muri Tigray gushaka gusubira ku butegetsi ngo zishyire mu bikorwa gahunda yo gufata abo mu bwoko bumwe nk'”abaturage bo mu cyiciro cya mbere” mu gihugu.
Yanasubiyemo itangazo leta yari yasohoye mbere yaho ivuga ko inyeshyamba zishe abaturage b’abasivile barenga 100 mu mujyi wa Kombolcha, ibyo inyeshyamba zo muri Tigray zahakanye.
Imirwano yakajije umurego kuva mu kwezi kwa gatandatu uyu mwaka ubwo inyeshyamba zisubizaga igice kinini cya Tigray harimo n’umurwa mukuru wayo Mekelle.
Ubu zibumbiye mu mutwe wa Tigray Defence Forces (TDF) uhuriwemo na TPLF n’indi mitwe yitwaje intwaro yaho.
Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n’ingabo za leta ya Ethiopia mu kwezi kwa cumi na kumwe mu 2020.
Abakuru ba TPLF bashwanye na Bwana Abiy ku bijyanye n’amavugurura muri politiki, nubwo kuba TPLF yarafashe ibigo bya gisirikare by’ingabo za leta byo muri Tigray ari yo yabaye imbarutso y’igitero leta yayigabyeho.
Leta ya Ethiopia ivuga ko TPLF ari umutwe w’iterabwoba, ariko TPLF yo ivuga ko ari yo leta y’akarere ka Tigray yemewe n’amategeko.
Comments are closed.