DRC: Minisitiri MUTAMBA Constant yahawe imbago atagomba kurenga

Ibinyamakuru muri Repubulika ya Demokarasi ya Congo, birimo n’ibiro ntaramakuru bya Congo, birasubiramo itangazo ry’umushinjacyaha mukuru ryo kuri uyu wa mbere wategetse ko Minisitiri w’ubutabera w’iki gihugu abujijwe kurenga umurwa mukuru Kinshasa mu gihe biteganyijwe ko atangira gukurikiranwa mu nkiko.

Ni nyuma y’uko ku cyumweru Inteko Ishingamategeko itoye ku bwiganze yemeza ko Minisitiri w’ubutabera atangira gukurikiranwa mu bucamanza ku byaha akekwaho byo kunyereza miliyoni z’amadorari yari agenewe kubaka gereza. Amategeko y’iki gihugu ateganya ko ahita yegura mbere yo gutangira kuburanishwa.

Mu ntangiriro z’uku kwezi, Minisitiri Constant Mutamba yitabye ubushinjacyaha i Kinshasa burimo kumukoraho iperereza, ku cyumweru Abadepite b’iki gihugu batoye bemeza ubusabe bw’umushinjacyaha bwo kumuregera ubucamanza akaburanishwa.

Iyi ni imwe muri dosiye zavuzweho cyane muri iki gihugu kuko mu gihe gishize Mutamba yavuze ko umuntu uzajya ahamwa no kunyereza umutungo wa leta yajya akatirwa urwo gupfa.

Ku cyumweru, ku badepite 363 bari bateranye, 322 batoye bashyigikira ko uyu mutegetsi aregwa mu rukiko, 29 batora babyanga, naho 12 barifata, nk’uko inteko ishingamategeko ya DR Congo ibitangaza.

Ni nyuma y’uko umushinjacyaha ahaye Inteko raporo y’iperereza yakoze kuri uyu minisitiri avuga ko ibisobanuro yatanze mu iperereza byatumye arushaho gukekwa aho kumweza.

Mutamba, w’imyaka 37 y’amavuko, akekwaho gutegeka kohereza miliyoni 19$ kuri kompanyi yigenga mu isoko ryo kubaka gereza nshya y’umujyi wa Kisangani mu ntara ya Tshopo.

Muri iryo soko ryari rifite agaciro ka miliyoni 29$ yose hamwe, 65% byayo yari amaze kwishyurwa kompanyi umushinjacyaha yavuze ko ari baringa, mu gihe amategeko ateganya ko ayishyurwa mbere ari 30% kandi bikabanza kwemezwa na Minisitiri w’Intebe.

Inteko Ishingamategeko n’umushinjacyaha bavuga ko ayo mafaranga aba yaranyerejwe iyo inzego z’ubutasi mu by’imari zitaza gufunga konti y’iyo kompanyi maze zikabwira izindi nzego zibishinzwe.

Uruhande rwa Minisitiri Mutamba, ruvuga ko kuba ayo mafaranga atarigeze atwarwa n’iyo kompanyi bidakwiye kwitwa kunyereza umutungo wa leta, bakavuga ko Mutamba azira “impinduka yazanye mu bucamanza no kubangamira amatsinda ya ‘mafia’.”