Urukiko rwanzuye ko Bwana Gerard URAYENEZA nyiri kaminuza n’ibitaro bya Gitwe akomezwa gufungwa
Urukiko rwisumbuye rwo mu Karere ka Muhanga rwategetse ko Urayeneza Gérard n’abo baregwa hamwe bakomeza gufungwa by’agateganyo iminsi 30, runasaba ko babiri baherutse kurekurwa n’Urukiko rw’ibanze rwa Ruhango bafatwa bakongera bagafungwa.
Kuri uyu wa gatatu nibwo urukiko rukuru rwo mu Karere ka Muhanga rwagombaga gufata umwanzuro ku ifunga n’ifungurwa ry’agateganyo rya Bwana URAYENEZA GERARD nyi’ibitaro na kaminuza ya Gitwe mu Karere ka Ruhango.
Urukiko rwa Muhanga ari kuburanishirizwa rwanzuye ko Bwana GERARD URAYENEZA ndetse n’abandi bari bafunganye bakomeza gufungwa iminsi 30, urukiko rwasabye kandi ko abandi bari bareganywe bakaba bararekuwe nabo bakongera gufatwa bagafungwa.
Iki kemezo Urukiko rwa Muhanga rugifashe nyuma y’urubanza rw’ubujurire ku ifunga n’ifungurwa Gérard Urayeneza na bagenzi be batanu bari bajuririye basaba ko barekurwa bagakurikiranwa bari hanze.
Isomwa ry’urubanza ryagombaga kuba kuri uyu wa 15 Nyakanga, 2020 saa kenda z’amanywa.
Urukiko rukaba rwahinduye italiki kubera impamvu zitaratangazwa.
Rwemeje ko aba bagabo bakomeza gufungwa iminsi 30 nk’uko Urukiko rw’ibanze rwa Ruhango rwari rwabyemeje.
Urukiko kandi rwasabye ko abagabo babiri bari bagizwe abere mu Rukiko rw’ibanze bahita bafatwa nyuma y’isomwa ry’urubanza.
Abo bagabo ni Benjamin Ruganiza na Dominique Rutaganda.
Mu iburanisha ry’ubushize, Urayeneza Gérard yari yasabye ko arekurwa atanze ingwate, kubera ko afite uburwayi bw’umuvuduko w’amaraso, kandi akaba afite n’inshingano zitandukanye i Gitwe.
Ubushinjacyaha bwavuze ko nta ngwate Gérard yatanga ihwanyije agaciro n’ubuzima bw’abantu biciwe i Gitwe.
Ubushinjacyaha bunavuga ko arekuwe yabangamira abatangabuhamya n’iperereza riri kumukorwaho.
Cyakora Gérard yavuze ko hari abandi batangabuhamya Urukiko rukwiye kumva bamushinjura barimo na bamwe mu barokotse Jenoside, babonye aho aba Pasitori 83 bicwa, kandi ko babishe Gérard adahari kuko yari yarahunze akagera i Gitwe barishwe.
We nabo bareganwa barashinjwa icyaha cya Jenoside no kuzimiza cyangwa gutesha agaciro ibimenyetso birebana n’amakuru ya Jenoside, ibyaha abo bose bahakana ko nta ruhare babigizemo.
