Ghana yegukanye igikombe Nyafrika ku nshuro ya 4 ku bari munsi y’imyaka 20

6,045

Ikipe y’umupira w’amaguru ya Ghana yaraye yegukanye igikombe Nyafrika ku batarengeje imyaka 20 nyuma yo gutsinda Uganda.

Kuri uyu wa Gatandatu, taliki 06 Werurwe 2021 muri Mauritania hasojwe imikino  ya nyuma  y’Afurika mu batarengeje imyaka 20 “Total U-20 Africa Cup of Nations 2021” yabaga ku nshuro ya 23 aho yatangiye taliki 14 Gashyantare 2021.

Ikipe y’igihugu ya Ghana yegukanye igikombe  nyuma yo gutsinda ku mukino wa nyuma ikipe y’igihugu ya Uganda ibitego 2-0. Ibitego bya Ghana byatsinzwe na Daniel Afriyie Barnieh ku munota wa 22 na 51. Ghana ni inshuro ya 4 yegukanye iki gikombe (1993, 1999, 2009 na 2021).

Uko irushanwa ryagenze muri rusange.

Uyu mwaka wa 2021, CAN U-20 yari isanzwe yitabirwa n’amakipe 8 yabaye  12 aho yagabanyijwe mu matsinda 3. Itsinda A ryarimo  Mauritania, Cameroun, Uganda na Mozambique, hakomeza Cameroun na Uganda.

Itsinda B ryarimo Burkina Faso, Tunizia, Namibia na Central African Republic, hakomeza  Central African Republic, Tunizia na Burkina Faso  naho itsinda C ryarimo  Ghana, Tanzania, Gambia na Morocco hazamuka  Morocco, Ghana na Gambia.

Muri ¼ cy’irangiza,  Ghana yasezereye Cameroun kuri penaliti 4-2 nyuma yo kunganya igitego 1-1, Gambia itsinda Central African Republic ibitego 3-0, Uganda isezerera Burkina Faso kuri penaliti 5-3 nyuma yo kunganya 0-0 naho Tunizia isezerera Morocco kuri panaliti 4-1 nyuma yo kunganya 0-0.

Mu mikino ya ½, Ghana yasezereye Gambia ku gitego 1-0 naho Uganda itsinda Tunizia ibitego 4-1.

Umukino wo guhatanira umwanya wa 3 wegukanwe na Gambia  itsinze Tunizia kuri penaliti 4-2 nyuma yo kunganya 0-0 naho umukino wa nyuma Ghana itsinda Uganda ibitego 2-0.

Ikipe ya Ghana, Uganda, Gambia na Tunizia zabonye itike yo kuzahagararira Afurika mu mikino ya nyuma y’igikombe cy’Isi  izabera muri Indonesia  kuva taliki 20 Gicurasi kugeza 12 Kamena 2021.

(Inkuru y’imvaho)

Leave A Reply

Your email address will not be published.