FDA yatangaje ko hafashwe icyemezo cyo gufunga izindi nganda 101 zikora ibinyobwa bisembuye bizwi cyane nk’inzoga z’ibyuma, nyuma y’ubugenzuzi bwagaragaje ko hari izitubahirizaga ibisabwa mu gukora no gushyira ku isoko ibyo bicuruzwa.
Icyemezo cyatangajwe mu ijoro ryo ku wa 2 Kanama 2026, kikaba gikurikira ibikorwa byo gukaza ubugenzuzi ku nganda zikora ibinyobwa bisembuye mu rwego rwo kurengera ubuzima bw’abaturage no kurwanya ibicuruzwa bishobora guteza ingaruka ku buzima.
Mu byemezo byafashwe harimo gufunga ibikorwa by’izo nganda no gutesha agaciro impushya zari zarahawe zo gukora no gukwirakwiza ibyo binyobwa. Hanategetswe ko ibyapa n’ibirango byazo bivanwa ahagaragara kugira ngo bidakomeza kuyobya abaguzi.
Iki cyemezo kije gikurikira ibindi byari biherutse gufatwa ku nganda zimwe na zimwe zari zaragaragayeho gukora ibinyobwa bitujuje ibisabwa, mu gihe ubuyobozi bwakomeje kugaragaza ko nta muntu uzihanganirwa mu gihe yica amabwiriza agenga ubuziranenge bw’ibiribwa n’ibinyobwa.
Abaturage basabwe kwirinda kugura cyangwa kunywa ibinyobwa bikomoka ku nganda zafunzwe, ndetse bagakomeza gutanga amakuru igihe babonye ibicuruzwa bikekwa ko bitujuje ubuziranenge.
More Read
Biteganyijwe ko ibikorwa byo kugenzura inganda n’ahacururizwa ibinyobwa bizakomeza hirya no hino mu gihugu, hagamijwe gukumira ibicuruzwa bishobora gushyira ubuzima bw’abaturage mu kaga no guteza igihombo ku bakora ubucuruzi bwubahiriza amategeko.
Abakora ibikorwa byo gutunganya ibinyobwa basabwe gukomeza kubahiriza amabwiriza yose abagenga kugira ngo ibicuruzwa byabo bikomeze kwemererwa kugera ku isoko.
Imibare ya Minisiteri y’Ubuzima (MINSANTE) igaragaza ko abantu 50 bishwe n’inzoga zitujuje ubuziranenge mu gihe 100 bahumye burundu kubera ingaruka zazo, mu mezi atandatu ya mbere ya 2026.
