Urukiko rukuru mu gihugu rwatesheje agaciro intsinzi ya Prezida rutegeka ko hakorwa andi matora mu mezi atanu.
Nyuma y’imvururu nyinshi n’imyigaragambyo myinshi y’abaturage batemeye ibyavuye mu matora ya Prezida wa Repubulika yabaye mu kwezi kwa Gatanu umwaka ushize wa 2019 mu gihugu cya Malawi, kuri uyu munsi urukiko rukuru rushinzwe kureberera itegeko nshinga muri icyo gihugu rwafashe umwanzuro wo gutesha agaciro ibyavuye mu matora y’umwaka ushize nyuma yo gusuzumana ubushishozi ibirego by’abatavuga rumwe n’ubutegetsi bwa Bwana ARTHUR PETER MUTHARIKA uri ku gasongero k’ubutegetsi bw’igihugu cya Malawi guhera taliki ya 31 Gicurasi 2014.
Urukiko rwavuze ko rushingiye ku bimenyetso byatanzwe n’abatavuga rumwe n’ubutegetsi buriho muri Malawi, urukiko rwasanze ko ayo matora yabaye ku italiki ya 21 Gicurasi 2019 yaranzwe n’utunenge twinshi ndetse ko hari n’impapuro nyinshi z’itora zari zisibanganye bityo ko kumenya icyo umuturage yari yatoye byagorana. Urukiko rwahise rutegeka ko ayo matora ateshwa agaciro, ndetse n’intsinzi ya PETER MUTHARIKA iteshejwe agaciro, urukiko rwategetse ko hategurwa andi matora mu gihe cy’amezi atanu, ariko igihugu kikaba kiri kuyoborwa na Mutharika Peter.
Dr Lozarius Chakwee niwe wari uhanganye bikomeye na Peter Mutharika
Komisiyo ishinzwe amatora yari yatangaje ko mu kiciro cya kabiri cyayo matora, PETER MUTHARIKA ariwe waje mbere n’amajwi 38.5 mu gihe Dr LOZARIUS CHAKWEE yari yagize amajwi agera kuri 35.4, ibintu byahise byamaganirwa kure n’abaturage benshi bashyigikiye Lazarius ku buryo bakomeje kwirara mu mihanda kugeza ubwo urukiko rutegetse ko ibyavuye mu matora biteshwa agaciro.
Comments are closed.