Perezida wa Leta Zunze Ubumwe za Amerika, Donald Trump, yatashye amara masa mu bihembo by’amahoro byitiriwe Nobel; by’umwihariko mu cyiciro cy’uwaharaniye amahoro ku Isi, birangira igihembo cyegukanywe n’Umunyafurika y’Epfo, Navi Pillay warwanyije Apartheid.
Ni ibihembo ngarukamwaka, aho kuri iyi nshuro byahereye ku wa 5 Ukwakira, bikazasoza ku wa 12 Ukwakira 2026.Ni ku nshuro ya 13 Trump ashyizwe kuri uru rutonde muri ibi bihembo mu byiciro bitandukanye mu 2018, 2020, 2024 na 2025. Komite y’abantu batanu bayoboye inama itanga ibi bihembo byitiriwe Nobel yaruciye irarumira ku kuba Trump atahawe igihembo.
Umuyobozi Mukuru w’iyi Komite yo muri Norvege, Jørgen Watne Frydnes, yavuze ko Navanethem ’Navi’ Pillay ari we uhawe iki gihembo ku wa 9 Ukwakira 2026.
Nyuma y’amasaha make bitangajwe ko atari we ugitsindiye, Trump yagiye ku rubuga rwe rwa Truth Social agira ati: “Komite ya Nobel yishyizeho ikimwaro kitazigera gisibangana inasuzuguza igihembo cya Nobel cyari ubukombe, ubwo yagihaga Navi Pillay wa Loni”.
Iyi komite yanze kugira icyo ivuga niba Trump yaba yaratekerejweho kugira ngo ahabwe iki gihembo kiri mu bikomeye ku Isi. Ubwo Jørgen Watne Frydnes yabibazwagaho n’itangazamakuru, yavuze ko iyi komite itajya ivuga ku bakandida batsinzwe (keretse iyo hashize imyaka 50).
Trump yari yarashyizeho igitutu iyi komite kugira ngo ahabwe iki gihembo ariko biba iby’ubusa. Muri Mutarama 2026, yanandikiye Minisitiri w’Intebe wa Norvege, Jonas Gahr Støre, ngo abimufashemo ariko biranga. Frydnes yavuze ko iyi komite ntaho ihuriye na Guverinoma ya Norvege, ati :“Twita ku bitureba”.
Ku wa Gatatu tariki ya 7 Ukwakira 2026, Trump yari yavuze ko yizeye gutahana intsinzi, yongera guhatiriza iyi komite ngo imuhe iki gihembo.
Yagize ati :”Sinzi umwanzuro wabo. Bafite izina rikomeye, birashoboka kutagiha abantu bameze nkanjye. Ariko umwaka ushize nari nagiriwe ubuntu bwo kugihabwa mu buryo buziguye n’uwari wagihawe, wanavuze ko mu mateka nta wundi ugikwiye utari Perezida Donald Trump”.
More Read
Yavuze ko yaharaniye amahoro agahosha intambara umunani zose ndetse ko indi ya cyenda, ihanganyemo igihugu cye na Iran, na yo yenda kuyihosha vuba.
Ati :“Nakoze ibintu bitarakorwa n’undi muntu. Ntabwo ndi gukina, ndi kubabwira ibihamya. Birashoboka ko nta wundi perezida wigeze uhosha intambara. Nahosheje umunani”.
Yakomeje avuga ko na Barack Obama yasimbuye ku butegetsi yahawe icyo gihembo mu 2009 nyuma y’umwaka umwe yari amaze ku butegetsi.
