Michelle OBAMA arasanga Trump atari akwiye kuyobora igihugu nka Amerika

9,700
Michelle Obama turns 56: See photos of her through the years

Michelle Obama yibasiye bikomeye Perezida Donald Trump wa Leta Zunze Ubumwe z’Amerika, mu gihe abademokarate bari kwitegura gutangaza ku mugaragaro Joe Biden nk’uwo bazahatana mu matora.

Mu butumwa bwuzuye imbamutima, Michelle Obama, umugore w’uwahoze ari perezida w’iki gihugu, yagize ati: “Donald Trump si perezida ukwiriye igihugu cyacu”.

Abatanyuzwe bo mu ishyaka ry’abarepubulikani rya Bwana Trump na bo bamaganye uyu Perezida w’Amerika, muri iyo nama nkuru y’ishyaka ry’abademokarate.

Amatora ya perezida w’Amerika azaba ku wa kabiri, tariki ya 3 y’ukwezi kwa cumi na kumwe uyu mwaka.

Bwana Trump, uri inyuma ya Bwana Biden mu mahirwe yo gutsinda amatora nkuko bigaragarazwa n’imibare y’amakusanyabitekerezo, na we yagize icyo avuga.

Mbere yaho ku munsi w’ejo ku wa mbere, mu ijambo ryo kwiyamamaza yavugiye mu mujyi wa Mankato muri leta ya Minnesota, Bwana Trump yaburiye ko Bwana Biden aramutse atsinze amatora, ibitangazamakuru byabura ababikurikira.

Kubera kwirinda coronavirus, abademokarate baretse gahunda zo guhuza imbaga muri iyi nama nkuru y’amajoro ane yo kugena umukandida wabo ibera mu mujyi wa Milwaukee muri leta ya Wisconsin.

Ariko ntibizwi niba iyi gahunda y’iyi nama – ahanini ikorwa mu buryo bw’iyakure hatangazwa amagambo yafashwe mbere kandi nta mbaga y’abantu ihari – ishobora kugira umurindi nk’uwo mu nama za mbere y’iki cyorezo.

Abarepubulikani na bo bazahura n’iyi ngorane yo kugabanuka bikomeye kw’abitabira, mu nama nkuru y’ishyaka ryabo izaba mu cyumweru gitaha, bagaragaza impamvu ari bo bakwiye gukomeza gutegeka iki gihugu indi myaka ine iri imbere.

Michelle Obama yavuze iki nyirizina?

Michelle Obama

Madamu Obama yifashe (recording) iryo jambo rye mbere yuko Bwana Biden mu minsi itandatu ishize atangaza senateri Kamala Harris nk’uwo baziyamamazanya wamubera visi perezida abaye atowe.

Mu kwibasira Bwana Trump mu ijambo rye ryasoje umunsi w’ejo ku wa mbere muri iyo nama, Madamu Obama yagize ati:

“Ntabwo ushobora kubeshya ko ushoboye muri aka kazi [ka perezida]”.

“Ubukungu bwacu bwarashwanyaguritse kubera virusi uyu perezida yamaze igihe kirekire cyane asuzugura”.

Yakomeje agira ati: “Kuvuga ikintu cyoroshye cyumvikana ko ubuzima bw’abirabura bufite agaciro, biracyasuzugurwa n’ibiro bya mbere bikomeye mu gihugu [bya perezida]”.

“Kubera ko buri gihe iyo duhanze amaso ibi biro bya White House tubyitezeho ubuyobozi, cyangwa kuduhoza, cyangwa n’igisa no kwerekana ko ibintu biri ku murongo, icyo tubona ahubwo ni akajagari, ugucikamo ibice no kutita na busa ku kababaro k’abandi”.

Yavuze ko imyaka ine ishize yakomereye ababyeyi nkawe kuyisobanurira abana b’Amerika.

Ati: “Babona abategetsi bacu bita abaturage bagenzi babo abanzi b’igihugu, mu gihe bakomeje gushishikariza ko abazungu ari bo bafite agaciro kandi ari bo mukiro”.

Madamu Obama yongeyeho ati: “Donald Trump si perezida ukwiriye igihugu cyacu. Yabonye igihe kirenze igicyenewe cyo kugaragaza ko ashoboye akazi, ariko bigaragara ko ibintu byamurenze”.

“Ikiriho ni uko adashoboye gukora icyo tumucyeneyeho. Uko ni ko ibintu bimeze”.

Yavuze ko Bwana Biden ari “umugabo mwiza cyane”, akomoza ku gihe uyu mukandida w’abademokarate yari akiri visi perezida ku butegetsi bw’umugabo we, Perezida Barack Obama.

Yambaye umukufi mu ijosi wanditseho ngo “Tora”, Madamu Obama yagize ati: “Tugomba gutora Joe Biden nkaho ari we makiriro y’ubuzima bwacu”.

Perezida Trump yasubije iki?

Aganira na BBC mu ndege ye Air Force One avuye mu ruzinduko rwo kwiyamamaza muri leta za Minnesota na Wisconsin, zikunze guhindagura ishyaka zitora mu matora ya perezida, Bwana Trump yasubije John Kasich wahoze ari Guverineri wa leta ya Ohio.

Bwana Kasich – wo mu ishyaka ry’abarepubulikani wahatanye na Bwana Trump mu matora yo mu 2016 – yatangaje ubutumwa yabanje kwifata (pre-recorded) ahamagarira Abanyamerika kudaha Trump manda ya kabiri.

Mu kumusubiza, Bwana Trump yagize ati: “Yaratsinzwe nk’umurepubulikani, kandi azanatsindwa nk’umudemokarate”.

“Uyu mugabo ni we watsinzwe bikomeye nk’umurepubulikani”.

“Nta muntu n’umwe uzashaka gushyigikira Joe uhunyiza [ufite ibitotsi]. Byarangira dufite igihugu kibishye cyane cya gisosiyalisti kizajya mu muriro utazima”.

Ejo ku wa mbere kandi, Bwana Trump yemeje ko mu ijambo azavugira muri White House mu cyumweru gitaha, azemera ku mugaragaro ko ishyaka ry’abarepubulikani rimugena nk’umukandida-perezida kuri manda ya kabiri.

Gahunda ze mu gihe yaba yongeye gutorwa zanenzwe n’abademokarate ndetse na bamwe bo mu ishyaka rye ry’abarepubulikani.

Ejo ku wa mbere, mu ijambo ryo kwiyamamaza yavugiye mu mujyi wa Mankato muri leta ya Minnesota, Bwana Trump yaburiye ko Bwana Biden aramutse atsinze amatora, ibitangazamakuru byabura ababikurikira.

Leave A Reply

Your email address will not be published.