Abaturage bo mu Karere ka Ngoma, mu Murenge wa Remera, bari mu gahinda nyuma y’aho umuturage witwa Nduwimana Pascal, wari uri mu kigero cy’imyaka 40, yasanzwe iwe mu rugo yishwe n’abantu bataramenyekana.
Aya mahano yabaye mu ijoro ryo kuri uyu wa mbere rishyira kuwa Kabiri taliki ya 22 Kamena 2026, mu Kagali ka Nyamagana, Umudugudu wa Kabuye. Nyakwigendera, wibanaga n’ubundi wenyine kuko yari akiri ingaragu, abaturanyi be bavuga ko bamubonye ataha ku mugoroba bakagira ngo agiye kuryama nk’ibisanzwe, gusa baje gutungurwa no kumubona hafi y’umuryango we mu rucyerera yashizemo umwuka, bityo bagakeka ko yaba yategewe iwe n’abo bagizi ba nabi bakamwica.
Mutuyimana Angelique, umwe mu baturanyi ba nyakwigendera, yavuze ko yababajwe n’urupfu rw’umuturanyi we, ndetse ko yatunguwe, ati:“Twatunguwe cyane n’urupfu rwa Pascal kuko nta muntu tuzi bari bafitanye amakimbirane. Nta n’uwamwumvise ataka, nkeka ko yatashye iwe mu rugo agasanga hari abamwubikiye bahita bamugirira nabi.”
Undi muturage witwa Mukimbiri Sammuel na we yemeje ko ejo ku mugoroba yabonye uyu mugabo atembera mu mudugudu nta kibazo afite. Yagize ati: “Njyewe namubonye ejo ku mugoroba ubona ameze neza cyane. Inkuru y’uko yishwe yantunguye mu buryo bukomeye. Turasaba ko ubutabera bukora akazi kabwo bwihuse, abakoze ubu bwicanyi bagafatwa.” Abaturage b’uyu mudugudu bavuze ko ibi bikorwa by’ubugizi bwa nabi bitari bisanzwe iwabo, kandi bakaba banenga bikomeye abantu bose bavutsa bagenzi babo ubuzima.
Umuyobozi w’Akarere ka Ngoma, Niyonagira Anathalie, yemeje aya makuru y’akababaro, ashimangira ko inzego z’ubuyobozi n’iz’umutekano zahise zigera aho byabereye. Umubiri wa nyakwigendera wahise ujyanwa mu bitaro kugira ngo hakorwe isuzuma ry’ubuzima (Autopsy), mu gihe iperereza ryo guhiga ababikoze ryahise ritangira.
More Read
Meya Niyonagira yatanze ubutumwa asaba abaturage kwirinda umuco wo kwihanira: “Turabasaba kwirinda ibyaha bikomeye nk’ibi. Niba hari abafite amakimbirane ashingiye ku bintu bitandukanye, bakwiriye kwegera ubuyobozi bukabafasha gukemura ibibazo mu buryo bw’amategeko, aho kwishakira ibisubizo mu buryo bubi.”
Ku rundi ruhande, Umuvugizi wa Polisi y’u Rwanda mu Ntara y’Uburasirazuba yibukije abaturage akamaro ko gutangira amakuru ku gihe kugira ngo ibyaha bikumirwe bitaraba. Yashimangiye ko inzego z’umutekano zitazajya zihanganira uwo ari we wese ushaka guhungabanya umutekano w’abandi.
Kugeza ubu, amakuru mashya ahari ni uko inzego z’umutekano zamaze guta muri yombi abantu bane (4) mu rwego rw’iperereza rya mbere, bakaba bagiye gukurikiranwaho uruhare rwabo muri ubu bwicanyi bwabereye mu Mudugudu wa Kabuye.
More Read
