Manchester City yageze ku mukino wa nyuma wa Champions League nyuma yo gutsinda isuzuguye Real Madrid ibitego 4-0 mu mukino wo kwishyura wa ½, iyisezerera ku giteranyo cya 5-1.
Uyu mukino wabereye kuri Etihad Stadium ku mugoroba wo ku wa Gatatu, tariki ya 17 Gicurasi 2023.
Manchester City yari imbere y’abafana bayo 52.313, yatsinze ibitego bine ibifashijwemo na Bernardo Silva (23’, 37’), Eder Militao witsinze (76’) na Julian Álvarez (90+1’) winjiye mu kibuga asimbuye.
Iyi kipe yakatishije itike yo kuzakina umukino wa nyuma uzayihuza na Inter Milan yawugezeho isezereye AC Milan, uteganyijwe kubera Istanbul ku wa 10 Kamena 2023.
Manchester City yakomeje kwandika amateka yo kumara imikino 23 idatsinzwe ndetse ku kibuga cyayo imaze kuhatsindira inshuro 15.
Yinjiye mu mukino ihabwa amahirwe n’ubwo ubanza wabereye kuri Santiago Bernabeu yari yawunganyije igitego 1-1. Yashakaga kugera ku mukino wa nyuma ku nshuro ya kabiri [nyuma ya 2020-21] mu myaka itatu mu gihe yari ihanganye n’ikipe imaze kwegukana Champions League inshuro 14.
Pep Guardiola nta mpinduka yakoze mu ikipe yifashishije mu cyumweru gishize mu gihe Carlo Ancelotti wa Real Madrid yafashe icyemezo cyo gukinisha Eder Militao utarakinnye ubushize kubera amakarita, asimbura Antonio Rudiger. Uyu yajishe Erling Haaland amubuza kurunguruka mu izamu rya Thibaut Courtois.
Mu mukino wo kwishyura, Real Madrid ntiyahiriwe kuko abakinnyi bayo barimo Vinicius Junior wafashwe na Kyle Walker na Karim Benzema wananiwe kumenera mu bwugariza bwa Manchester City ntacyo bayifashije.
Amahirwe akomeye Ikipe yo muri Espagne yabonye ni ku munota wa 45 w’umukino aho Toni Kroos yateye ishoti rikomeye, rigakubita umutambiko w’izamu, umupira ukajya hanze.
Manchester City yari nziza yasoje umukino itsinze ibitego 4-0, icyura intsinzi yabonye mu buryo bworoshye.
Ancelotti yashimangiye ko Manchester City yari ikwiye gutsinda kuko ‘yakinnye neza kuturusha.’
Yakomeje ati “Mu mwaka ushize byari bitandukanye. Bari beza kuturusha iri joro nk’uko umwaka ushize twari beza kubarusha.’’
Guardiola na we yavuze ko imyitwarire y’ikipe ye ‘ishamaje cyane.’ Ati “Urebye ikipe twahuraga na yo, Real Madrid muri ½ cya Champions League, twasabwaga kwitwara neza kandi twabikoze by’umwihariko mu gice cya mbere.’’
Manchester City yitezweho gukora amateka yo kwegukana ibikombe bitatu aho isigaje gutsinda umukino umwe [wa Chelsea FC] ikegukana Shampiyona y’u Bwongereza, Premier League. Iyi kipe kandi itegereje guhura na Manchester United ku mukino wa nyuma wa FA Cup uzabera i Wembley.
Guardiola yashimangiye ko bari hafi kwandika ayo mateka kandi ‘tugiye kugerageza.’
Uyu Munya-Espagne gutsinda umukino wa Real Madrid byatumye aba umutoza wa gatatu ugize imikino 100 amaze gutsinda muri Champions League, inyuma ya Carlo Ancelotti (107) na Alex Ferguson (102).
Guardiola yageze ku mukino wa nyuma wa Champions League ku nshuro ya kane mu gihe Ancelotti we yatozaga umukino wa 191 muri UEFA Champions League, akuyeho agahigo ka Alex Ferguson watoje 190.
