Jorge Messi ise wa Lionnel MESSI akaba ari nawe umuhagarariye mu mategeko yandikiye urwandiko ruvuga ko amasezerano ya Messi muri FC Barcelona yarangiranye n’umwaka wa 2019/2020 mu gihe L Liga ivuga ko amasezerano agikomeje
Nyuma y’igihe bacecetse, Lionel Messi na se Jorge basohoye urwandiko rwo guhangana na FC Barcelona na La Liga babibutsa ko amasezerano bari kwishingikiriza yarangiye.
Urwo rwandiko rugira ruti “Ntabwo tuzi neza amasezerano La Liga yasuzumye nibyo bashingiyeho bavuga ko igiciro cyo kumugura kigomba kugumaho kandi umukinnyi we yarahisemo guhagarika amasezerano nyuma y’umwaka w’imikino wa 2019/2020.
LA LIGA yasohoye urwandiko ruvuga ko Messi agomba kuguma muri FC Barcelona uretse igihe haboneka ikipe yishyura igiciro cyo kumugura cya miliyoni 700 z’amayero.
Jorge Messi uhagarariye umuhungu we Messi yibukije aba bombi ko amasezerano ya Messi yarangiranye n’umwaka w’imikino wa 2019/2020 ndetse uyu kizigenza yemerewe kujya aho ashaka ntacyo Barça yishyuje.
Iyi ntambara y’amagambo ikomeje gutera urujijo kuko mu minsi ishize aribwo Messi yandikiye FC Barcelona ayimenyesha ko adashaka kuyigumamo bityo ikwiriye kumurekura akigira ahandi.
Jorge Messi yanenze La Liga na Perezida wayo Javier Tebas ati “Iri n’ikosa rikomeye cyane ku ruhande rwanyu.N’ukuri ko igiciro cya miliyoni 700 z’amayero zo kurekura Messi cyarangiranye n’umwaka w’imikino ushize.”
Hari amakuru avuga ko Messi yiyemeje guhagarika guterana amagambo na FC Barcelona aho yemeye kuyigumamo muri uyu mwaka w’imikino utaha akarangiza neza amasezerano ye.
Muri iki cyumweru,Jorge, se wa Lionel Messi akaba ari na we mujyanama we mu by’akazi, yahuye na Perezida Josep Maria Bartomeu w’ikipe ya Barcelona baganira kuri ejo hazaza h’uyu rutahizamu ukomoka muri Argentine.
Ku wa kabiri w’icyumweru gishize, Messi w’imyaka 33 yamenyesheje iyi kipe ko ashaka kuyivamo kuri iyi mpeshyi, agasoza igihe cy’imyaka 20 ayimazemo.
Guillem Balagué, umunyamakuru w’imikino wo muri Espagne, avuga ko nta mwanzuro impande zombi zagezeho muri ibyo biganiro by’ejo ku wa gatatu, akaba yiteze ko hazaba ibindi biganiro.
Ati: “Ntekereza ko mu gihe runaka hazabaho kwinjira mu cyiciro cy’amasezerano Messi akagenda”.
Manchester City iri guhabwa amahirwe menshi yo kugura uyu mukinnyi wegukanye igihembo cya ’Ballon d’Or’ inshuro esheshatu, nk’uwarushije abandi bakinnyi ku isi.
Uyu munyamakuru Balagué avuga ko iyi kipe yo muri Premier League “yamaze kwemeza Messi”.
Ariko Messi na Barça ntibumvikana ku ngingo iri muri kontaro ye nshya ijyanye no kuba yaba yemerewe kuyivamo ku buntu.
City yacyenera ko Barça yemera ko ayivamo ku mafaranga ari munsi ya miliyoni 700 z’ama-euro yo kumwemerera kuyivamo, nkuko bikubiye muri iyo kontaro ubu Messi na Barça batavugaho rumwe.
Umunyamakuru Balagué yabwiye ikiganiro BBC Radio 5 Live ati: “Barashaka [City] ko rwose ibi bintu bishoboka. Ikibazo gusa ni uko imibare itari guhura”.
Hari ingingo yongewe muri kontaro nshya ya Messi yo kugera mu mwaka wa 2021, ivuga ko ashobora kuva muri Barça ku buntu.
Iyo ngingo ivuga ko yashoboraga kuyivamo iyo aza kubimenyesha ikipe ye bitarenze ku itariki ya 10 y’ukwezi kwa gatandatu uyu mwaka, itariki yari guhura n’impera ya shampiyona.
Ariko, icyorezo cya coronavirus cyatumye umwaka w’imikino 2019-2020 ukomeza ukagera ku itariki ya 23 y’ukwezi gushize kwa munani, ku itariki ya 25 asaba kuva muri iyi kipe.
Ikipe ya Manchester City iyoboye izindi mu gushakisha kizigenza Lionel Messi,bivugwa ko yamaze kumuha amasezerano y’imyaka 5 ndetse akazarangira yinjije miliyoni 623 z’amapawundi.
Ibi bivuze ko Messi yazajya ahembwa ibihumbi 14,200 ku isaha, ibihumbi 341,000 ku munsi, 2.4m buri cyumweru naho mu kwezi azahembwa miliyoni 10.4 mu mapawundi.Ku mwaka,Messi yazajya yinjiza miliyoni 124.6 z’amapawundi.
Amakuru avuga ko Messi azasinya imyaka 3 yo gukina muri Manchester City hanyuma indi myaka 2 ya nyuma ayikine mu ikipe ya New York City FC yo muri USA muri Major League Soccer nayo yaguzwe n’abaherwe ba Manchester City.
Comments are closed.