Abagenzuzi b’imiti muri Amerika bemeje burundu umuti urwanya virusi wa remdesivir nk’ugiye kuvurishwa abarwayi ba Covid-19 bari mu bitaro.
Ikigo cy’Amerika gishinzwe ubuziranenge bw’imiti n’ibiribwa (FDA) cyavuze ko uyu muti, wahawe izina rishya rya Veklury, ugabanyaho iminsi itanu igihe bifata ngo abarwayi boroherwe, nkuko byagaragajwe n’amagerageza yawo.
Itangazo ikigo FDA cyasohoye rigira riti: “Veklury ni wo muti wa mbere wa COVID-19 ubonye uruhushya rwa FDA”.
Mu cyumweru gishize, ishami ry’umuryango w’abibumbye ryita ku buzima (OMS/WHO) ryavuze ko umuti wa remdesivir ufite akamaro kari hagatiya gacye na busa ku gukira k’umurwayi.
OMS yavuze ko ibyo ibishingira ku bushakashatsi bwayo bwite – ariko uruganda Gilead rukora uwo muti rwamaganye ibyo byavuye mu bushakashatsi bwa OMS.
Kuva mu kwezi kwa gatanu, remdesivir yari yemewe gukoreshwa muri Amerika nk’umuti w’amaburakindi gusa.
Uherutse guhabwa Perezida Donald Trump nyuma yuko bamusanzemo Covid-19. Kuva icyo gihe ntayo barongera kumusangamo.
Kugeza ubu muri Amerika hamaze gutangazwa abantu barenga miliyoni 8,4 banduye Covid-19, muri bo abarenga 220,000 yarabishe nkuko imibare ya Kaminuza ya Johns Hopkins ibigaragaza.
Iyo ni yo mibare ya mbere iri hejuru cyane ku isi.
FDA yavuze iki nyirizina?
Mu itangazo rya FDA ivuga ko uwo muti wemejwe ejo ku wa kane ngo “ukoreshwe ku barwayi bakuru n’abana b’imyaka 12 no hejuru yayo kandi bapima ibiro bitari munsi ya 40 mu kubavura Covid-19 bicyeneye ko bashyirwa mu bitaro”.
Stephen Hahn ukuriye ikigo FDA yagize ati:
“Uku kuwemeza uyu munsi [ejo ku wa kane] byisunze amakuru yavuye mu magerageza menshi iki kigo cyagenzuye bikomeye kandi iyi ni intambwe y’ingenzi muri siyansi muri iki cyorezo cya Covid-19”.
FDA yavuze ko uyu mwanzuro wo kwemeza uyu muti wafashwe hagendewe ku isesengura ry’amakuru yavuye mu magerageza atatu yakozwe mu buryo bwo gutomboza ku barwayi ba Covid-19 bashyizwe mu bitaro barimo abarembye n’abarwaye byoroheje.
OMS ivuga iki?
Mu bushakashatsi yakoze, OMS yasuzumye ingaruka z’ine mu yishobora kuba imiti ya Covid-19.
Remdesivir yari umwe muri iyo miti, ariko OMS yanasuzumye umuti hydroxychloroquine wa malaria, wifitemo ubushobozi bwo gutera ubwirinzi.
Hari kandi n’imiti ibiri mu yoroshya ubukana bwa VIH/HIV (SIDA) ari yo lopinavir na ritonavir.
Umuti wa dexamethasone ubu ukoreshwa cyane ku barwayi ba Covid-19 bari mu cyumba cy’indembe mu Bwongereza, ntabwo wo wasuzumwe mu bushakashatsi bwa OMS.
Iyo miti ine yageragejwe ku barwayi bakuze 11,266 bo mu bitaro 500 byo mu bihugu birenga 30 ku isi.
Ibyavuye muri ubwo bushakashatsi bwa OMS ntibirasuzumwa n’abandi bashakashatsi.
Bigaragaza ko nta n’umwe muri iyo miti ine ufite akamaro gakomeye mu kurinda kwicwa na Covid-19 cyangwa kugabanya igihe umurwayi wayo amara mu bitaro, nkuko OMS ibivuga.
BBC
Comments are closed.