Fabrice Shema Ngoga, Perezida w’Ishyirahamwe ry’Umupira w’Amaguru mu Rwanda (FERWAFA), biravugwa ko ashobora kurekurwa kuri uyu wa kabiri nyuma y’uko amasezerano yagiranye n’Ubushinjacyaha yahawe umugisha n’Urukiko.
Aya masezerano, azwi nk’amasezerano y’ubwumvikane hagati y’uregwa n’Ubushinjacyaha, yemejwe n’Urukiko nyuma yo gusuzuma ibiyakubiyemo n’ibyo impande zombi zari zumvikanyeho.
Amakuru yagiye hanze kuri uyu wa kabiri agaragaza ko Shema Ngoga yamaze kwishyura amafaranga yose yasabwaga mu rwego rw’ayo masezerano, angana na 600,000 USD, ni ukuvuga asaga miliyoni 850 Frw hakurikijwe igipimo cy’ivunjisha rikoreshwa muri iki gihe.
Icyemezo cy’Urukiko cyo kwemeza ayo masezerano bivuze ko nta zindi nzitizi zisigaye zatuma akomeza gufungwa, bityo akaba agomba kurekurwa akaburana ari hanze cyangwa urubanza rugakurikizwa hashingiwe ku byo impande zombi zumvikanyeho.
Ifatwa n’ifungwa rya Shema Ngoga ryari ryakuruye impaka nyinshi mu bakurikiranira hafi umupira w’amaguru mu Rwanda no mu karere, bitewe n’umwanya ukomeye yari afite mu buyobozi bwa FERWAFA. Mu gihe yari afunzwe, ibikorwa by’iri shyirahamwe byakomeje kuyoborwa n’izindi nzego zaryo nk’uko amategeko abiteganya.
More Read
Abahanga mu by’amategeko bavuga ko amasezerano nk’aya agamije koroshya itangwa ry’ubutabera, aho uregwa n’Ubushinjacyaha bumvikana ku ngingo zimwe na zimwe z’urubanza, bikagabanya igihe n’amikoro byatwarwaga n’urubanza rurerure.
Kurekurwa kwa Shema Ngoga bitegerejwe n’abatari bake mu muryango wa ruhago nyarwanda, cyane cyane mu gihe FERWAFA iri mu bikorwa bitandukanye birimo amarushanwa y’imbere mu gihugu n’itegurwa ry’amarushanwa mpuzamahanga amakipe y’u Rwanda yitabira.
Nubwo amasezerano yamaze kwemezwa n’Urukiko, haracyategerejwe ibisobanuro birambuye by’inzego zibishinzwe ku ngingo zose zari zigize ayo masezerano n’ingaruka zayo ku birego yari akurikiranyweho.
More Read
