DRC: M23 iravuga ko yabaye ihagaritse imirwano, Leta iti ahubwo twayishenye.

Umutwe w’inyeshyamba za M23 watangaje ko wabaye uhagaritse imirwano ndetse ukaba wasubiye mu birindiro byayo, mu gihe Leta yo ivuga ko ahubwo uwo mutwe wakubiswe inshuro ugahungira mu mashamba.

Kuri uyu wa gatanu taliki ya 1 Mata 2022 umutwe wa M23 watangaje ko wahisemo kuba uhagaritse imirwano ugasubira mu birindiro byayo biherereye mu mashyamba ya Virungs, mu Itangazo ryazo rivuga ko kuva kuri uyu wa gatanu M23 irekuye ibice yari yarafashe igasubira “mu birindiro byo kwirinda” kugira ngo “habe akarere kanini kawutandukanya” n’ingabo za leta “mu kwirinda imirwano”.

Abajijwe ibyo birindiro byabo, Major Willy Ngoma uvugira uyu mutwe yagize ati: “Turi ku misozi ya Tchanzu na Runyoni” uduce bongeye kwigarurira muri iki cyumweru.

Ku ruhande rwazo, ingabo za leta ya DRC zo zatangaje ko zashenye ibirindiro bikuru (Etat major) bya M23.

Umuvugizi wa FARDC muri Kivu ya ruguru, Lt Col Ndjike Kaiko, yavuze ko ibyo birindiro byari hafi y’ikirunga cya Sabyinyo bakaba babishenye.

Imirwano yahereye mu rukerera kuwa mbere yatumye abarenga 24,000 bava mu byabo mu duce tw’imirwano muri teritwari ya Rutchuru y’intara ya Kivu ya ruguru, benshi bahungiye muri Uganda, nk’uko ONU ibivuga.

Iyi mirwano kandi yatumye hahanurwa kajugujugu ya UN yagenderaga mu gace k’imirwano yapfiriyemo abasirikare umunani ba MONUSCO bo muri Pakistan, Uburusiya na Serbia.

Izi nyeshyamba ziyobowe na Gen Sultani Makenga zavuze ko zitangaje aka gahenge kugira ngo abategetsi bategure “ibiganiro mu mahoro byo gushaka umuti w’ikibazo kidutandukanya kimaze imyaka irenga 10”.

Mu gihe ihagaritse imirwano, M23 ivuga ko ifite “uburenganzira bwo kwitabara mu buryo bukomeye” mu gihe yakongera guterwa n’ingabo za leta.

Lt Col Ndjike Kaiko wewe avuga ko “FARDC itazemera na rimwe ko M23 igira ibirindiro ku butaka bwa Congo” kandi ko biteguye “gutera”.

Buri ruhande rushinja urundi ko ari rwo rwatangije imirwano rutera ibirindiro by’urundi.