Iran yavuze ko itazafungura Inzira ya Hormuz mu gihe Amerika itarubahiriza ibyo yemeye

Leta ya Iran yatangaje ko itazafungura Inzira ya Hormuz, imwe mu nzira z’amazi zifatiye runini ubucuruzi bw’ibikomoka kuri peteroli ku Isi, kugeza igihe Leta Zunze Ubumwe za Amerika zizaba zujuje ibyo zemeye mu masezerano y’agateganyo impande zombi zagiranye muri Kamena 2026.

Aya magambo yatangajwe na Perezida w’Inteko Ishinga Amategeko ya Iran, Mohammad Baqer Qalibaf, wavuze ko Washington igomba kubanza gukuraho ibihano yafatiye Iran, gufungura umutungo wayo wafunzwe mu mahanga, guhagarika ibikorwa bya gisirikare ndetse n’ikorwa ry’icyo Tehran yise “igabanywa ry’uburenganzira bwa Iran ku byambu byayo” mbere y’uko Inzira ya Hormuz yongera gufungurwa.

Qalibaf yavuze ko Iran itazemera gusubira inyuma kuri iki cyemezo kandi ko izakoresha inzira za dipolomasi n’iz’umutekano kugira ngo Amerika yubahirize ibyo yemeye.

Ibi bibaye nyuma y’aho amasezerano y’agateganyo yari yarashyizweho umukono hagati ya Iran na Amerika muri Kamena 2026 atangiye kudindira kubera kutumvikana ku micungire n’imikoreshereze y’Inzira ya Hormuz. Perezida Donald Trump yari yatangaje mu ntangiriro za Nyakanga ko ayo masezerano “yarangiye”, mu gihe Iran na yo yahise ivuga ko yayahagaritse by’agateganyo.

Inzira ya Hormuz ni imwe mu nzira z’amazi z’ingenzi ku Isi kuko inyuramo igice kinini cya peteroli na gaz byoherezwa ku masoko mpuzamahanga. Gufungwa kwayo byatumye habaho impungenge ku bukungu bw’Isi ndetse bituma ibiciro bya peteroli bikomeza kuzamuka ku masoko mpuzamahanga.

More Read

Eritrea yahagaritse umubano wa dipolomasi na Ethiopia mu gihe umwuka mubi ukomeje gufata indi ntera mu Karere

Musk Yahawe Inshingano Muri Minisiteri Y’Ingabo Za Amerika

Ingabo z’u Rwanda muri UNMISS zashimiwe uruhare rwazo mu kurinda abaturage ba Sudani y’Epfo

Amerika:Umunyamakuru wa CNN yangiwe kujyana na Trump mu ndenge

Mu minsi ishize, Iran yakomeje gushimangira ko nta bwisanzure bwuzuye bwo kongera kunyuzamo amato buzabaho igihe cyose Amerika itarubahiriza ibisabwa byose. Abayobozi bayo bavuga ko ikibazo kitari ku mutekano wo muri Hormuz gusa, ahubwo ko gifitanye isano n’umubano mugari hagati y’ibihugu byombi ndetse n’ibihano Amerika yakomeje gufatira Tehran.

Ku ruhande rwa Amerika, ubuyobozi bwa Trump bwakomeje kuvuga ko Iran ari yo ikomeje kubangamira ibiganiro by’amahoro no gushyira mu kaga urujya n’uruza rw’ubucuruzi bwo ku rwego mpuzamahanga. Icyakora impande zombi zikomeje gushinjanya kudashyira mu bikorwa ibyo zari zarumvikanyeho, ibintu bikomeje guteza impungenge amahanga ku hazaza h’umutekano wo mu Karere k’Uburasirazuba bwo Hagati.

Abasesenguzi bavuga ko niba impande zombi zitazabona ubwumvikane mu gihe cya vuba, ikibazo cya Hormuz gishobora gukomeza kugira ingaruka zikomeye ku bucuruzi mpuzamahanga, ku biciro bya peteroli ndetse no ku mutekano w’akarere muri rusange.