Intumwa ziturutse mu bihugu bitandukanye byo ku Mugabane wa Afurika no mu bindi bice by’Isi ziteraniye mu Mujyi wa Kigali mu Nama Mpuzamahanga ku Mutekano muri Afurika (International Security Conference on Africa – ISCA), igamije kuganira ku bibazo n’amahirwe aterwa n’iterambere ry’ikoranabuhanga mu rwego rw’umutekano n’ibikorwa bya gisirikare.
Iyi nama izamara iminsi ibiri iri kubera muri Kigali Convention Centre yatangiye ku mugaragaro kuri uyu wa gatatu taliki ya 12 Kanama 2026, yahurije hamwe abayobozi bakuru mu nzego z’umutekano n’igisirikare, abafata ibyemezo muri za guverinoma, abahagarariye imiryango mpuzamahanga n’iy’uturere, abashakashatsi ndetse n’inzobere mu by’umutekano n’ikoranabuhanga.
Insanganyamatsiko nyamukuru y’iyi nama yibanda ku buryo iterambere ryihuse ry’ikoranabuhanga rikomeje guhindura imiterere y’ibibazo by’umutekano ku Isi, by’umwihariko ku Mugabane wa Afurika. Abitabiriye iyi nama bari kuganira ku ikoreshwa ry’ubwenge buhangano (Artificial Intelligence), ikoranabuhanga ryifashishwa mu kugenzura no gukusanya amakuru, umutekano wo mu ikoranabuhanga (cybersecurity), ndetse n’uburyo ikoranabuhanga rigezweho rikoreshwa mu bikorwa bya gisirikare.
Abateguye iyi nama bavuga ko Afurika iri mu gihe gikomeye cyo guhangana n’ibibazo by’umutekano birimo iterabwoba, ibyaha bikorwa hifashishijwe ikoranabuhanga, amakimbirane yambukiranya imipaka n’ibindi bibazo bishobora guhungabanya ituze ry’ibihugu. Bagaragaza ko guhangana n’ibi bibazo bisaba ubufatanye bw’ibihugu ndetse no gukoresha ikoranabuhanga mu buryo bujyanye n’amahame mpuzamahanga.
Mu biganiro bitandukanye biri kubera muri iyi nama, hibandwa kandi ku buryo ibihugu bya Afurika byakongera ubushobozi mu guhanga udushya mu rwego rw’umutekano, guteza imbere ubushakashatsi no gushora imari mu ikoranabuhanga rishobora gufasha mu gukumira no kurwanya ibyaha n’ibindi bikorwa bihungabanya amahoro.
Abitabiriye inama bagaragaje ko nubwo ikoranabuhanga ritanga amahirwe menshi mu kurushaho kunoza ibikorwa by’umutekano, rishobora no gukoreshwa nabi n’abagizi ba nabi, imitwe y’iterabwoba cyangwa abandi bashobora guhungabanya umutekano w’ibihugu. Ibi bituma hakenerwa ingamba zihuriweho n’ibihugu ndetse n’imiryango mpuzamahanga mu kugenzura no gukoresha neza iri koranabuhanga.
Kwakira iyi nama bikomeza gushimangira uruhare rw’u Rwanda nk’imwe mu nkingi z’ibiganiro mpuzamahanga ku mutekano, amahoro n’iterambere ry’ikoranabuhanga muri Afurika. Mu myaka yashize, Kigali yakomeje kwakira inama zikomeye ku rwego rw’akarere n’Isi, ziganira ku bibazo by’umutekano, ubukungu n’iterambere rirambye.
Biteganyijwe ko imyanzuro izava muri iyi nama izatanga umurongo ku buryo ibihugu bya Afurika byakomeza gukoresha ikoranabuhanga nk’igikoresho cyo kubaka umutekano urambye, mu gihe hanashakwa uburyo bwo guhangana n’ingaruka mbi zishobora guterwa n’imikoreshereze yaryo itanoze.
More Read
