Mogadishu: Abasirikare ba Somalia babohoje Elite Hotel yari yigaruriwe na al-Shabab

3,196
indo Banner01
Inzego z'ubutabazi bwihuse ziri kuri Elite Hotel i Mogadishu muri Somalia nyuma y'iturika ryo ku itariki ya 16 y'ukwa munani mu 2020

Itsinda ry’abasirikare kabuhariwe ba Somalia rivuga ko ryasoje ihagarara ry’ubuzima kuri hoteli yo mu murwa mukuru Mogadishu yari yagabweho igitero n’intagondwa za al-Shabab zigendera ku mahame akaze ya kisilamu.

Abantu batari munsi ya 17 ni bo bemezwa ko biciwe kuri ‘Elite Hotel’ iri mu gace ka Lido kari ku mwaro w’inyanja.

Mbere, umuvugizi wa leta yari yavuze ko abapfuye ari 11, hiyongereyeho n’intagondwa eshanu.

Polisi ivuga ko mu biciwe muri icyo gitero harimo abakozi babiri ba leta, batatu mu bashinzwe umutekano wa hoteli, abaturage bane b’abasivile ndetse n’abandi bataramenyekana umwirondoro wabo.

Abateye ku munsi w’ejo ku cyumweru baturikije igisasu cyari giteze mu modoka iri hanze y’iyo hoteli, mbere yuko bayigarurira.

Iyi hoteli imaze igihe gito yubatswe, ni iy’umudepite, kandi ikunze kugendererwa n’abategetsi.

Ababibonye bavuze ko uko guturika kwa mbere ko mu modoka kumvikanye mu bice bitandukanye bya Mogadishu, haba akajagari ubwo abantu bahungaga ako gace.

Abakora mu nzego z’umutekano bahise bazitira iyo hoteli barasana n’abagabo bitwaje imbunda bari bari imbere muri hoteli.

Nyuma y’amasaha ane, Ismael Mukhtaar Omar, umuvugizi wa leta ya Somalia, yatangaje kuri Twitter ko icyo gitero kirangiye kandi ko abakigabye bose bishwe.

Bitangazwa ko mu bapfuye harimo n’umutegetsi mukuru wo muri minisiteri y’itangazamakuru ya Somalia ndetse n’undi wo muri minisiteri y’ingabo. Abandi bantu babarirwa muri za mirongo batangajwe ko bakomeretse.

Umuvugizi wa leta ya Somalia yavuze ko abantu barenga 200 barokowe muri iyo hoteli.

Urubuga rw’amakuru Dhacdo.com rwo muri Somalia rutegamiye kuri leta rwatangaje ko iyo hoteli ari imwe mu nyubako zirinzwe bikomeye i Mogadishu.

“Aba-mujahideen [abarwanirira isilamu] bagabye igitero kirimo ubumaritiri [gupfa uzize imyemerere] n’itsinda ry’abakomando kuri hoteli y’umudepite wo mu itsinda ry’abatagira idini [leta ya Somalia]”.

Al-Shabab, ikorana n’umutwe wa al-Qaeda, imaze imyaka irenga icumi ibiyogoza muri Somalia.

Yatsinzwe i Mogadishu n’ingabo za leta ya Somalia zifatanyije n’ingabo z’ibihugu bimwe – birimo n’u Burundi – zoherejwe n’umuryango w’Ubumwe bw’Afurika kubungabungayo amahoro.

Mu mezi abiri ashize, ibitero bya al-Shabab byariyongereye i Mogadishu.

Mu cyumweru gishize, muri gereza habayeho kurasana hagati y’imfungwa za al-Shabab n’abashinzwe umutekano, hapfa abantu batari munsi ya 20.

Izo ntagondwa zari zashoboye kubona intwaro zageragezaga gutoroka iyo gereza irinzwe bikomeye iri i Mogadishu.

Elite Hotel

Gutanga ibitekerezo byahagariswe.