Kuri uyu wa kabiri tariki ya 2 Werurwe , Polisi ishami rishinzwe kurwanya ibiyobyabwenge (ANU) ryafashe abantu 3 bafite urumogi ibiro birenga 31 n’udupfunyika tw’urumogi 200 rwinjiye mu gihugu ruvuye mu gihugu cya Uganda hakoreshejwe inzira zitemewe (panya), byabereye mu Murenge wa Kinihira mu karere ka Rulindo.
Umuyobozi ushinzwe guhuza ibikorwa bya Polisi n’abaturage mu Ntara y’amajyarugu Superintendent of Police (SP) Alex Ndayisenga yavuze ko abafashwe ari Ildephonse Ndayambaje, Fidele Nteziyaremye, na Jean Claude Rukundo.
SP Ndayisenga yavuze ko aba bafashwe biturutse ku makuru yatanzwe n’umuturage , bwa mbere Polisi yabanje gufata uwitwa Jean Claude Rukundo afite udupfunyika tw’urumogi arukuye mu Murenge wa Kinihira agiye kurucuruza mu Mujyi wa Kigali, akimara gufatwa yabwiye abapolisi ko arugurishwa n’uwitwa Ildephonse Ndayambaje nawe wahise afatwa afite ibiro 3 yarashyiriye abakiriya be ahitwa Miyove.
Ndayambaje akimara gufatwa yatangaje ko uru rumogi arukura mu gihugu cya Uganda akarubika mu rugo rw’uwitwa Fidele Nteziyaremye utuye mu Murenge wa Cyinzuzi, Akagali ka Migendezo, hanyuma abapolisi bagiye muri urwo rugo bahasanga ibiro 28 by’urumogi, ari nabwo Nteziyaremye nawe yahise afatwa.
SP Ndayisenga yashimiye abaturage batanze amakuru uru rumogi rugafatwa rutarakwira mu baturage, anaburira abantu bijandika mu bikorwa byo gucuruza ibiyobyabwenge ko babireka kuko amayeri yabo yose yamenyekanye
Yagize ati ”Inzego zishinzwe umutekano zifatanije n’abaturage zahagurukiye abagira uruhare mu gukwirakwiza urumogi mu gihugu kandi uburyo bwose bukoreshwa bwaramenyekanye twabagira inama yo kubireka kuko iyo ufashwe uhanwa n’amategeko, kandi ibihano biremereye.”
Abafashwe ni ibyo bafatanwe bashikirijwe ikigo cy’igihugu gishinzwe ubugenzacyaha (RIB) ngo hakorwe iperereza.
Iteka rya minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cy’urumogi mu biyobyabwenge bihambaye.
Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.
Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.
Comments are closed.