Tombola y’uburyo amakipe azaba agabanyije mu matsinda y’Igikombe cya Afurika cya 2025 kizabera muri Morocco mu mpera z’uyu mwaka, yasize Cote D’Ivoire ifite igikombe giheruka cya 2023 iri kumwe na Cameroon.
Iyi tombola igaragaza uko amakipe y’ibihugu azahura yabaye ku mugoroba wo kuri uyu wa Mbere tariki ya 27 Mutarama 2025, muri Théâtre Mohammed V i Rabat muri Morocco mu gihe habura amezi 11 kugira ngo iri rushanwa rikomeye muri ruhago y’Afurika ritangire ku nshuro ya 35 kuva ryatangira mu 1957.
Umunyabigwi Ilyas Touba wafashije Morocco kwegukana iri rushanwa baheruka mu 1976 ni we wazanye Igikombe cya Afurika mbere ya tombola y’iri rushanwa.
Abayobozi batandukanye ku ruhande rwa Morocco na CAF n’abakinnyi b’amakipe y’ibihugu byabo barimo Umunya- Misiri Essam El Hadry, Umunya Cameroon Patrick Mbom, Umunya Mali Momo Sissoko, Umunya Zambia Christopher Katongo, Umunya Tunisia Aymen Mathkouthi n’Umunya Cote D’ivore Gervinho.
Tombola yashyize Morocco izakira iri rushanwa mu itsinda A hamwe na Mali, Zambia na Comoros.
Cote D’Ivoire ifite igikombe giheruka cya 2023 iri kumwe na Cameroon, Gabon na Mozambique mu itsinda F.
Tanzania na Uganda zihagarariye Afurika y’iburasirazuba zisanze mu itsinda rimwe rya C hamwe na Nigeria na Tunisia.
Igikombe cy’Afurika cya 2025 kizabera muri Morocco kuva ku wa 21 Ukuboza 2025 Kugeza ku wa 16 Mutarama 2026, mu mijyi itandatu irimo Rabat, Casablanca, Agadir, Marrakech, Fes na Tangier.
Stade icyenda ni zo zizakira iri rushanwa ari zo Complexe Sportif Prince Moulay Abdellah, Stade Al Barid, Stade Olympique Annexe Complexe Sportif Prince Moulay Abdellah, Complexe Sportif Prince Héritier Moulay EL Hassan, Complexe Sportif Mohammed V, Grand Stade d’Agadir, Grand Stade de Marrakech, Complexe Sportif de Fès na Grand Stade de Tanger.
Amakipe abiri ya mbere muri buri tsinda mu matsinda atandatu n’andi ane ya gatatu yitwaye neza, ni yo azabona itike yo gukomeza muri 1/8.
Umukino ufungura irushanwa uzahuza Morocco na Comoros ku wa 21 Ukuboza 2025 Kuri Prince Moulay Abdellah Stadium mu Mujyi wa Rabat.
Uko amatsinda ya CAN 2025 ateye
Itsinda A: Morocco, Mali, Zambia na Comoros
Itsinda B: Zimbabwe, Angola, Afurika y’Epfo na Misiri
Itsinda C: Tanzania, Uganda, Tunisia na Nigeria
Itsinda D: Botswana, Benin, DR Congo na Sénégal
Itsinda E: Sudani, Guinée Equatorial, Burkina Faso na Algeria
Itsinda F: Mozambique, Gabon
Cameroun na Côte d’Ivoire.
Comments are closed.