Umutwe wa M23 ku wa Mbere tariki ya 9 Ukuboza werekanye abasirikare bo mu ngabo za Repubulika Iharanira Demokarasi ya Congo (FARDC) bafatiye mu mirwano ikomeje gusakiranya impande zombi.
Umuvugizi w’Igisirikare cy’uyu mutwe, Lt Col Willy Ngoma ni we werekanye aba basirikare; mu gikorwa cyabereye i Kanyabayonga muri Teritwari ya Lubero.
Kugeza ku wa Mbere imirwano ikomeye muri iriya Teritwari yari igeze ku munsi wa munani wikurikiranya isakiranya M23 n’ihuriro ry’ingabo za Leta ya Congo Kinshasa.
Uruhande rwa Leta rurigamba gukubita ahababaza M23, n’ubwo nta gace na kamwe mu two igenzura zirashobora kuyambura.
Uwo mutwe biciye muri Lawrence Kanyuka uvugira ishami rya Politiki ryawo ivuga ko ibivugwa na Leta y’i Kinshasa ari “icengezamatwara” ikomeje gukora yifashishije imbuga nkoranyambaga.
Aberekanwe barimo Sergeant-Major Kotakota Alexis w’imyaka 45 y’amavuko, uyu akaba yarafatiwe na M23 ahitwa Myobu.
Barimo kandi Soldat du 2ème Classe Tombo Dadi na mugenzi we witwa Isaie Umbere Kamwa.
Sergeant-Major Kotakota yavuze ko mbere yo gufatwa mpiri, we na bagenzi be bari bahawe misiyo yo “kwigarurira uduce tugenzurwa na M23 mbere y’uko inama ya Perezida Tshisekedi na Perezida Kagame. Twari hamwe na FDLR na Wazalendo.”
Ku Cyumweru tariki ya 15 Ukuboza ni bwo ba Perezida Kagame na Tshisekedi bazahurira i Luanda muri Angola, mu nama igamije gukemura ibibazo biri hagati ya Congo n’u Rwanda.
Kotakota avuga ko misiyo yo kwigarurira uduce tugenzurwa na M23 bayihawe na Gen Chiko [Tshitambwe] usanzwe ari Umugaba Mukuru wungirije w’Ingabo za FARDC ushinzwe ibikorwa.
Uyu Chico kandi ngo yanasabye abasirikare gukora ibishoboka byose bakangisha M23 abaturage, biciye mu kurasa ibisasu mu duce dusanzwe dutuwe cyane n’abasivile.
M23 ivuga ko icyiteguye kubahiriza agahenge yiyemeje ku wa 7 Werurwe 2023, gusa nanone ikanashyira imbere kurinda abasivile bakomeje guhahamurwa n’ubutegetsi bw’i Kinshasa.
(Src:Umuryango)
Comments are closed.