Perezida wa Leta Zunze Ubumwe za Amerika, Donald Trump, yasobanuye ko atari afite umugambi nyakuri wo guha Dana White, Umuyobozi Mukuru w’ishyirahamwe ritegura imikino y’iteramakofe ya MMA, Ultimate Fighting Championship (UFC), inshingano zo kuba umuvugizi w’Ibiro bya Perezida wa Amerika (White House), ahubwo ko yari ari gutebya.
Ibi Trump yabitangaje ku Cyumweru, tariki ya 8 Ugushyingo 2026, ubwo yari abajijwe n’abanyamakuru ku butumwa yari yashyize ku rubuga rwe rwa Truth Social, umunsi umwe mbere yaho, avuga ko yahaye Dana White uyu mwanya.
Trump yavuze ko igitekerezo cyo gushyira White kuri uwo mwanya cyari igitekerezo cyo gusetsa, ariko ko uyu muyobozi wa UFC asa n’uwakunze icyo gitekerezo.
Yagize ati: “Nari ndi gutebya gusa, ariko ntekereza ko Dana yakunze icyo gitekerezo. Ni umuntu ushoboye cyane.”
Ku wa Gatandatu, tariki ya 7 Ugushyingo 2026, Trump yari yanditse ku rubuga rwe rwa Truth Social ko yahaye Dana White akazi ko kuba umuvugizi wa White House, amusaba ko yakwemera kugakora.
More Read
Muri ubwo butumwa, Trump yavuze ko White ari umurwanyi ukomeye, ndetse anavuga ko ashobora kujyana na we bamwe mu bakinnyi bakomeye ba UFC bakaba abafasha be mu kazi.
Mu bakinnyi yavuzemo harimo Khabib Nurmagomedov, Islam Makhachev, Justin Gaethje, Daniel Cormier na Amanda Nunes. Yavuze ko abo barwanyi bashobora kumufasha guhangana n’abo yise abatavuga rumwe na Leta ye.
Nyuma y’ubwo butumwa, Dana White na we yashyize ku rubuga rwa Instagram ifoto igaragaza ameze nk’uri inyuma y’aho umuvugizi wa White House atangariza amakuru, ayiherekeza amagambo agira ati: “On to the next chapter”, bisobanuye ngo “Tugiye mu kindi cyiciro.”
More Read
Nubwo Trump yaje kuvuga ko yari ari gutebya, yavuze ko agiteganya guhura na Dana White ku wa Mbere, tariki ya 9 Ugushyingo, i Washington, asobanura ko bazaganira ku bindi bibazo bitari ibijyanye n’uwo mwanya.
Impamvu igitekerezo cya Trump cyakuruye impaka
Iki gitekerezo cyaje mu gihe ubuyobozi bwa Trump buri mu mpinduka zikomeye nyuma y’uko Ishyaka ry’Abarepubulikani ritsinzwe mu matora yo hagati mu gihembwe (Midterm Elections), bigatuma Abademokarate begukana ubwiganze mu mitwe yombi ya Kongere ya Amerika.
Trump yari aherutse kandi gutangaza ko Stephen Miller azasimbura Susie Wiles ku mwanya w’umuyobozi w’abakozi ba White House (Chief of Staff).
Umwanya w’umuvugizi wa White House na wo wari ukiri ubusa nyuma y’uko Katie Zacharia awuvuyeho amaze iminsi itanu gusa awuhawe, mu gihe uwari awuriho mbere, Karoline Leavitt, yari yaravuye muri izo nshingano mu mpera za Kanama 2026.
Dana White amaze imyaka isaga 20 ayobora UFC, akaba ari umwe mu bantu bazwiho kuba hafi ya Donald Trump. Ubu bucuti bwatangiye mu myaka ya mbere ya UFC, ubwo Trump yakiraga imikino y’iri shyirahamwe muri hoteli na kazino ye ya Atlantic City.
White kandi yashyigikiye Trump mu bikorwa byo kwiyamamaza mu matora ya Perezida yo mu 2024, ndetse yagiye amuherekeza mu bikorwa bitandukanye bya politiki n’iby’imikino.
Icyakora, kugeza ubu Trump ntiyatangaje izina ry’undi muntu uteganyijwe guhabwa inshingano zo kuba umuvugizi wa White House.
