“Nshobora cyane kongera kubikora” Trump yaciye amarenga ko ashobora kongera kwiyamamaza
Donald Trump wahoze ari perezida wa Amerika yaciye amarenga akomeye ko ashobora kongera kwiyamamariza kujya muri White House.
Yabwiye imbaga y’abantu ahitwa Sioux City, muri leta ya Iowa ati “nshobora cyane, cyane, cyane kubikora nanone” mu 2024.
Yavugiraga mu ikoraniro rya mbere muri atanu ateganyijwe yo kwamamaza abakandida b’abarepubulikani mu matora azaba mu cyumweru gitaha.
Perezida Joe Biden wa Amerika nawe arimo kuzenguruka mu gihugu ashakira amajwi abademokrate muri ayo matora.
BBC dukesha iyi nkuru ivuga ko Yaba Biden cyangwa Trump nta n’umwe uri ku rupapuro rw’ayo matora y’ abagize inteko ishingamategeko n’abakuriye za leta z’ingenzi.
Ariko aya matora azaha isura politiki ya Amerika mbere y’amatora ya perezida mu myaka ibiri iri imbere.
Kuwa kane nijoro, Trump yasubiyemo ingingo ye idafite ibihamya ko yatsinzwe amatora yo mu 2020 kubera kwiba amajwi.
Ati: “Niyamamaje kabiri, natsinze kabiri, kandi ubwa kabiri nakoze neza kurusha ubwa mbere, mbona miliyoni z’amajwi menshi mu 2020 kurusha mu 2016.
“Gutyo kandi mbona amajwi menshi kurusha undi perezida wese wabayeho mu mateka yacu.
“Kandi n’ubu kugira ngo igihugu cyacu gitere imbere, kigire amahoro no gukomera. Birashoboka cyane, cyane, cyane ko nzabikora nanone.”
Yongeraho ati: “Vuba cyane. Mwitegure.”
Mu 2020 Trump yabonye amajwi menshi – miliyoni 72 – atarigeze abona undi perezida uriho, ariko aratsindwa kuko Biden yabonye amajwi miliyoni 81.
Kuwa kane, Biden yagiye mu kwamamaza i New Mexico na California – amaze kandi iminsi ahura n’abajyanama ngo bategure kongera kwiyamamaza kwe mu 2024.
Si ubwa mbere Trump aciye amarenga yo kwiyamamaza bwa gatatu.
Mu Ukwakira gushize mu ihuriro ry’i Texas yagize ati: “Nshobora kuzabikora nanone.”
Mbere gato muri Nzeri ari i Pennsylvania yagize ati: “Nshobora rwose kongera nkabikora.”
Hakiri kare kuwa kaneKellyanne Conway wahoze ari umujyanama wa Trump ari i Washington DC yavuze ko uyu wahoze ari shebuja “azatangaza vuba” imigambi ye yo kuba yaba perezida.
Kellyyanne yavuze ko ashimira Trump kuba muri uyu mwaka yaratsinze amashyushyu yo kuvuga ko aziyayamaza, kuko byari guhungabanya kwamamaza abakandida b’abarepubulikani mu matora agiye kuba.
Trump niyiyamamaza mu 2024 ashobora kubanza guhatana n’ab’imbere mu ishyaka rye.
Abashobora kuba abakeba be bakomeye barimo uwahoze ari visi perezida we Mike Pence na Ron DeSantis Guverineri wa leta ya Florida.
(Inkuru ya Isabelle KALISA)
Comments are closed.