UBUSHINWA: Ubushinwa bwavuze ku inkomoko ya COVID-19

5,195

Ubushinwa bwanze ubusabe bwuko hakorwa iperereza mpuzamahanga ryigenga ku nkomoko y’iki cyorezo cya covid-19 cyugarije isi muri iki gihe hataramenyekana inkomoko yacyo.

Chen Wen, umudiplomate w’Ubushinwa wo ku rwego rwo hejuru muri ambasade yabwo mu Bwongereza, yabwiye BBC ko ubwo busabe bushingiye ku mpamvu za politike.

Yongeyeho ko byarangaza Ubushinwa mu rugamba burimo bwo kurwanya iki cyorezo cyibasiye isi kidasize ubushinwa.

Ubushinwa bwanze ko hakorwa iperereza nyuma y’uko abenshi bahamya badashidikanya ko iyi virusi yaba yarakozwe n’ikiremwa muntu igakwirakwizwa mu bantu ku bw’inyungu za politiki.

Ni na nyuma yaho imwe muri Leta yo muri Amerika yareze Ubushinwa guteza Covid-19.

Iyi virusi yagaragaye bwa mbere mu isoko ricuruza ibikomoka mu mazi ryo mu mujyi wa Wuhan mu Bushinwa mu mpera y’umwaka ushize wa 2019.

Hagati aho, icyegeranyo cy’umuryango w’ubumwe bw’Uburayi (EU/UE) gishinja Ubushinwa gukwirakwiza amakuru y’ibinyoma ajyanye n’iki cyorezo kitarabonerwa umuti n’urukingo.

Ikigo cya cy’umuryango w’ubumwe bw’uburayi gikurikirana ibikorwa byo hanze (External Action Service) kivuga ko Uburusiya, n’Ubushinwa ku kigero gito, “byohereje amakuru ayobya” muri EU no mu bihugu bihana imbibi nayo.

Perezida Donald Trump wa Leta Zunze Ubumwe z’Amerika na we yakomeje kugenda yibasira Ubushinwa ku buryo bwitwaye kuri iki cyorezo cyakomeje kuzahaza isi.

Abahanga mu bumenyi bwa siyansi bagiye bamagana amakuru ahwihwisa ko ubu bwoko bushya bwa covid-19 bwakorewe mu kigo cy’ubushakashatsi (laboratoire) cyo mu mujyi wa Wuhan.

Aba bahanga bavuga ko nta gihamya ishingiye kuri siyansi ihari kugeza ubu ibyemeza.

Email yanyu ntaho izigera igiragazwa