Polisi ikorera mu Karere ka Nyamagabe yafashe abantu 175 mu rugo rwa Nyirahuku Marie Rose barimo gusenga barenze ku mabwiriza yo kwirinda icyorezo cya COVID-19.
Bafashwe kuwa Gatandatu tariki ya 29 Mutarama, mu Mudugudu wa Gakoma, Akagari ka Kigeme mu Murenge wa Gasaka.
Umuvugizi wa Polisi mu Ntara y’Amajyepfo, Superintendent of Police (SP) Theobald Kanamugire yavuze ko gufatwa kwa bariya bantu byaturutse ku makuru yatanzwe n’abaturage.
Polisi ivuga ko abafaswe baturukaga mu madini atandukanye.
Kanamugire avuga ko ubwo Polisi yahageraga yasanze bari bicaye begeranye mu nzu abandi bari hanze, nta muntu wari wambaye agapfukamunwa, hari hafunganye ku buryo bigaragara ko nta mwuka uhagije uhari.
Mu igenzura n’ibipimo byakorewe bari bantu 175 byagaragaye ko harimo babiri banduye COVID-19, abandi babiri batarikingije urukingo na rumwe naho abandi batandatu barakingiwe urukingo rumwe gusa.
SP Kanamugire yashimiye abatanze amakuru yatumye bariya bafatwa, bantu bagafatwa, anagaya abantu bakirimo kurenga ku mabwiriza yo kwirinda COVID-19.
Yagize ati” COVID-19 ntaho yagiye iracyahari, nta muntu ugomba kwirara yibwira ko icyorezo cyarangiye. Amabwiriza arahari kandi agomba kubahirizwa, bariya bantu bagombaga kujya gusengera mu nsengero zujuje ibisabwa kandi zirahari.”
Abafashwe barigishijwe, abadakingiye barakingirwa abamaze kwandura bajyanwa mu kato, banacibwa amande hakurikijwe amabwiriza y’inama njyanama y’Akarere.
Comments are closed.