Malawi: Umunyapolitike ukomeye arashinjwa gucura umugambi wo kwica Perezida

Umunyapolitike ukomeye utavuga rumwe n’ubutegetsi muri Malawi yarezwe gucura umugambi wo kwica Perezida w’icyo gihugu Lazarus Chakwera.

Patricia Kaliati, umunyamabanga mukuru w’ishyaka UTM, yatawe muri yombi mu cyumweru gishize acyekwaho “gucura umugambi afatanyije n’abandi wo gukora icyaha gikomeye”.

Ku wa mbere, ubwo yitabaga mu rukiko rwo mu murwa mukuru Lilongwe, uwo mugore w’imyaka 57 ntiyavuze. Ariko umwunganizi we mu mategeko yavuze ko uwo munyapolitike akomeje kuvuga ko ari umwere, nkuko ibitangazamakuru byo muri Malawi byabitangaje.

Amakuru macye ajyanye n’uwo uvugwa ko ari umugambi wo kwica Perezida Chakwera ni yo yatangajwe, ndetse abanyapolitike batandukanye batavuga rumwe n’ubutegetsi bavuga ko ibirego kuri Kaliati bishingiye ku mpamvu za politike.

Mbere yuko iburanisha ritangira, abashyigikiye ishyaka UTM bateraniye hanze y’urukiko baririmba indirimbo zamagana leta, nkuko ibiro ntaramakuru AFP byabitangaje.

Imbere mu cyumba cy’iburanisha, urukiko rwumvise ko Kaliati afite abandi bantu babiri bacuranye uwo mugambi – bivugwa ko barimo kwihishahisha.

Amaherezo umucamanza yanzuye ko Kaliati ashobora kurekurwa by’agateganyo amaze kwishyura amafaranga y’ingwate, mu gihe amaperereza akomeje.

Umushinjacyaha wa leta yari yasabye ko Kaliati afungwa ikindi cyumweru kimwe.

Polisi ya Malawi yavuze ko irimo gukurikiza amategeko ndetse ko uburenganzira bwa Kaliati buzubahirizwa.

Ishyaka rye, UTM, ryari riri mu rugaga ruri ku butegetsi kugeza muri Kamena (6) uyu mwaka, ubwo ryaruvagamo nyuma y’urupfu rw’umukuru waryo, Saulos Chilima, wari Visi Perezida wa Malawi.

Yapfuye afite imyaka 51 y’amavuko nyuma yuko indege ya gisirikare yari arimo ikoreye impanuka mu ishyamba mu majyaruguru ya Malawi.

Kuva icyo gihe, Kaliati yitangaje nk’umukandida wo gusimbura Chilima ku buyobozi bw’ishyaka, agamije kuzahatana na Chakwera mu matora ya perezida yo mu mwaka utaha.

Kaliati, wahoze ari umwarimukazi mu mashuri abanza mbere yuko yinjira muri politike, azwi cyane ku kutarya iminwa kwe no kuvuga nta guca ku ruhande.

(HABIMANA Ramadhan)