Mu Rwanda rwo hambere aha, mu rwego rwo gushimira abahize abandi ubutwari, hifashishwaga ubwoko 3 bw’impeta aribwo Umudende (impeta y’ubutwari yambikwaga uwishe ababisha 7 ku rugamba), Impotore (impeta y’ubutwari yo yahabwaga uwivuganye ababisha cyangwa abanyamahanga 14 abatsinze mu rukubo ndetse no gucana uruti (impeta y’ikirenga yahabwaga uwahitanye ababisha 21 ku rugamba mu mihango ikomeye yitabirwaga n’umwami) nyamara kuri ubu ho hifashishwa imidali y’ishimwe. Muri Ruhago na ho hakoreshwa imidali ariko igihembo nyamukuru ari igikombe.
Reka turebe ibikombe 10 biherekezwa n’amafaranga menshi mu mupira w’amaguru ku isi, n’amwe mu mateka yabyo duhereye ku mwanya wa 10.
10) Copa del Rey
Iki gikombe kizwi nka Campeonato de Espana-Copa de Su Majestad El Rey abenshi bakaba bakita Copa del Rey (Igikombe cy’Umwami) cyangwa “La Copa” gikinirwa muri Espagne, kikaba cyaratangiye mu 1903 (imyaka 26 mbere ya shampiyona ya Espagne “La Liga”. Copa del Rey, bwa mbere ikinwa, yatwawe na Real Madrid mu gihe ikipe imaze kuyitwara inshuro nyinshi ari FC Barcelone (30). Igikombe giheruka cya Copa del Rey, yitabirwa n’amakipe 126 kuri ubu, gifitwe na FC Valence. Iki gikombe, gikoze muri Feza (Silver), gifite uburebure bwa 75cm kikaba gipima ibiro 15. Ikipe igitwaye , uretse kuba ihita ibona itike yo gukina UEFA Europa League mu mwaka w’imikino ukurikira, ikazanakina Supercopa de Espana (Igikombe kiruta ibindi cya Espagne), ihabwa n’akayabo k’amayero ka miliyoni imwe.
9) FA Cup
The Football Association Challenge Cup, izwi cyane nka “The FA Cup”, gusa kuva muri 2015 yitwa “The Emirates FA Cup” ku bw’Umuterankunga.
Ni igikombe gikinirwa mu gihugu cy’Ubwongereza mu irushanwa ryitabirwa n’amakipe asaga 735, kikaba cyaratangiye gukinwa muri Nyakanga 1871, bikigira igikombe cy’igihugu gikuze kurusha ibindi ku isi. Ikipe imaze kucyegukana inshuro nyinshi ni Arsenal FC (14), ikaba ari na yo imaze kugera kuri final inshuro nyinshi 21. Iki gikombe ikipe igitwaye, uretse kuba ihita ibona itike yo gukina UEFA Europa League mu mwaka w’imikino ukurikira, ikanakina FA Community Shield, ihabwa amapawundi 3,600,000.
8) Africa Cup of Nations (AFCON)
The CAF Africa Cup of Nations, izwi cyane mu magambo y’impine y’Igifaransa nka CAN bivuga (Coupe d’Afrique des Nations) cyangwa Total Africa Cup of Nations ku bw’Umuterankunga, ni igikombe cya Afurika cy’amakipe y’ibihugu cyatangiye gukinirwa mu 1957 kikaba gikinwa rimwe mu myaka 2 kuva mu 1968.
Kuva kuwa 20 Nyakanga 2017, iki gikombe kitabirwa n’amakipe 24 (aho kuba 16 nk’uko byari bisanzwe) kigakinwa muri Kamena (aho kuba muri Mutarama nk’uko byari bisanzwe), kuva kandi muri 2013 iki gikombe gikinwa mu myaka y’igiharwe kugira ngo kitagongana n’igikombe cy’Isi. Iki gikombe cya Afurika ikipe imaze kugitwara inshuro nyinshi ni Misiri (Egypt 7) na ho ifite igikombe giheruka ni Algeria yagitwaye muri 2019. Ikipe igitwaye ihita ihabwa na amadorali ya Amerika miliyoni 4.5.
7) UEFA Europa League
UEFA Europa League, mu magambo y’impine izwi nka UEL, ni irushanwa ritegurwa n’ Ishyirahamwe ry’umupira w’amaguru ku mugabane w’i Burayi (UEFA) rikaba ryaratangiye gukinwa bwa mbere mu 1971.
Ryitabirwa n’amakipe 160 yose hamwe, hagendewe ku buryo yitwaye mu bikombe by’imbere mu bihugu abarizwamo maze agashyirwa mu matsinda 48 (group stages), nyuma hakiyongeraho amakipe 8 aba yasezerewe ari aya 3 mu matsinda ya UEFA Champions League. Ikipe ifite iki gikombe giheruka ni Chelsea FC, mu gihe ifite byinshi ari FC Seville (5), ikipe itwaye iki gikombe cy’ibiro 15 gikoze muri Feza cyakozwe n’uwitwa Bertoni, uretse kuba ihita ikatisha itike yo gukina UEFA Champions League mu mwaka w’imikino ukurikira ikazanakina n’ igikombe kiruta ibindi ku mugabane w’i Burayi (UEFA Super Cup), ihabwa n’ amayero 8,500,000.
6) Copa Libertadores
The CONMEBOL Libertadores, izwi kandi cyane nka Copa Libertadores de America, ni irushanwa twagereranya na Champions League yo muri Amerika y’epfo cyane ko rihuza amakipe, yabaye aya mbere iwayo, ariko yo muri Amerika y’epfo rikaba ritegurwa n’impuzamashyirahamwe y’umupira w’amaguru muri Amerika y’epfo (Confederacion Sudamericana de Futbol).
Iri rushanwa ryatangiye gukinwa mu 1960 rikaba kuri ubu ryitabirwa n’amakipe 47 aturutse mu mashyirahamwe 10 atandukanye.
Ikipe ifite ibikombe byinshi ikaba ari Independiente yo muri Argentine (7) mu gihe ifite igikombe giheruka ari Flamengo yo muri Brazil. Ikipe igitwaye, uretse kuba ihita ibona itike yo gukina FIFA Club World Cup (Igikombe cy’isi cy’ama Club), ihabwa n’akayabo k’amadorai ya Amerika 12,000,000.
5) Copa America
CONMEBOL Copa America ni irushanwa ry’amakipe y’ibihugu yo muri Amerika y’epfo, ryatangiye gukinwa mu 1916 rikaba ari ryo rushanwa rikuze kurusha ayandi ahuza amakipe y’ibihugu, gusa kuva mu 1990 hatumirwamo n’amakipe yo muri Amerika ya ruguru no hagati (CONCACAF) ndetse n’amakipe yo muri Aziya (AFC). Iri rushanwa, na ryo ritegurwa na CONMEBOL twabonye haruguru rikaba ryitabirwa n’amakipe 12 cyangwa 16.
Ryitwaga Campeonato Sudamericano de Fútbol mu ki Espagnole cyangwa Copa Sul-Americana de Futebol mu gi Portugues kugeza mu 1975.
Igihugu kimaze kuritwara inshuro nyinshi ni Uruguay (15) mu gihe igihugu gifite igikombe giheruka ari Brazil.
Igihugu gitwaye iki gikombe cy’ibiro 7.1 n’uburebure bwa 61cm gikoze muri Zahabu, gihabwa amadorari ya Amerika miliyoni 28.
4) UEFA European Championship (Euros)
The UEFA European Football Championship izwi cyane nka Euros cyangwa Euro ni irushanwa ry’amakipe y’ibihugu yo ku mugabane w’i Burayi ritegurwa na UEFA, rikaba ryaratangiye gukinwa mu 1958, gusa kuva mu 1960 rikaba riba buri nyuma y’imyaka 4 mu mwaka ugabanyika na 4 (Annee bissextile), bivuze ko riba imyaka 2 mbere cyangwa nyuma y’Igikombe cy’Isi. Iri rushanwa kuri ubu ryitabirwa n’amakipe 24, ibihugu bimaze kuryegukana inshuro nyinshi ni Ubudage na Espagne birifite inshuro 3, mu gihe igihugu gifite irushanwa riheruka ari Portugal. Igihugu cyegukanye igikombe cy’iri rushanwa gikoze muri Feza, gipima ibiro 8 n’uburebure bwa 60cm, gihabwa asaga miliyoni 27 z’amayero.
3) UEFA Champions League
UEFA Champions League izwi mu magambo y’impine nka UCL yahoze yitwa European Cup kuva mu 1955, itangira kugeza mu 1992, kuva ubwo ryitwa UEFA Champions League rikaba ari irushanwa rihuza amakipe yo ku mugabane w’i Burayi yabaye aya mbere iwayo, ritegurwa na UEFA. Iri ryo ryitabirwa n’amakipe 32 agashyirwa mu matsinda 8, rikaba ari ryo rushanwa ry’amakipe (club) rikomeye kurusha ayandi mu mupira w’amaguru w’i Burayi. Ikipe ifite ibi bikombe byinshi ni Real Madrid (13) na ho ifite igikombe giheruka ni Liverpool FC.
Ikipe itwaye igikombe cy’iri rushanwa kiba gikoze muri Feza gifite uburebure bwa 74cm n’ibiro11, uretse kuba ihita ibona itike yo kuzakina irindi ry’umwaka utaha w’imikino, ikazakina na UEFA Super Cup ndetse na FIFA Club World Cup, ihabwa na miliyoni 19 z’amayero.
2) FIFA World Cup
Iki kizwi cyane nka World Cup, Coupe du Monde (Igikombe cy’Isi), kikaba ari igikombe gitegurwa n’ishyirahamwe ry’umupira w’amaguru ku isi (FIFA).
Iki gikombe cyatangiye gukinwa mu 1930, kikaba kiba buri nyuma y’imyaka 4 ariko mu mwaka utagabanyika na 4, gusa ntikigeze kiba mu 1942 n’1946 kubera intambara y’Isi ya 2. Kikaba gikinwa n’amakipe y’ibihugu 32 aturutse mu mpuzamashyirahamwe 6 arizo (AFC, CAF, CONCACAF, CONMEBOL, OFC, na UEFA). Iki gikombe gikinirwa bwa mbere cyatwawe na Uruguay, gusa igihugu kimaze kugitwara inshuro nyinshi ni Brazil (5) na ho Ubufaransa ni bwo bufite igikombe giheruka. Iki gikombe gikoze muri Zahabu gifite uburebure bwa 36.5cm kikaba gipima ibiro 5, ukegukanye ahabwa miliyoni 38 z’amadorari y’a Amerika.
1) English Premier League
English Premier League bita EPL mu magambo y’impine, izwi cyane nka Premier League, ikaba ari irushanwa ry’icyiciro cya mbere mu gihugu cy’Ubwongereza rihuza amakipe 20.
Ryatangiye gukinirwa mu 1888 ryitwa Football League kugeza mu 1992 rihinduriwe izina rikitwa English Premier League.
Amakipe 4 ya mbere abona itike yo gukina UEFA Champions Legue mu mwaka w’imikino ukurikira. Ikipe ifite igikombe cy’iri rushanwa inshuro nyinshi ni Manchester United (20) na ho ifite igikombe giheruka ni Liverpool FC. Iki gikombe kiba gikoze muri Feza (Silver) kigapima ibiro 25 n’uburebure bwa 76cm, ikipe icyegukanye ihabwa amapawundi miliyoni mirongo itatu n’umunani (38).
(Source:Radio10)
Comments are closed.