Umukuru w’ishami ry’umuryango w’abibumbye ryita ku buzima (OMS/WHO) avuga ko isi itita mu buryo bungana ku bibazo bikomeye byihutirwa byibasira abirabura n’abazungu.
Tedros Adhanom Ghebreyesus yavuze ko igice gito gusa cy’imfashanyo ihabwa Ukraine ari cyo cyahawe andi makuba ajyanye n’imibereho ari ku isi.
Yavuze ko gufasha Ukraine ari “ingenzi cyane” kuko ibibazo bihari “bigira ingaruka ku isi yose”.
Ariko yavuze ko akarere ka Tigray mu majyaruguru ya Ethiopia, Yemen, Afghanistan cyangwa Syria bitarimo kwitabwaho mu buryo bumwe na Ukraine.
Mu kiganiro n’abanyamakuru ku wa gatatu, Bwana Tedros yagize ati: “Sinzi niba rwose isi yita cyo kimwe ku buzima bw’abirabura n’ubuzima bw’abazungu”.
Yongeyeho ati: “Nkeneye kuvugisha ukuri nta guca ku ruhande ko isi itarimo gufata inyoko-muntu mu buryo bumwe.
“Bamwe baruta abandi. Kandi iyo mvuze ibi, birambabaza. Kuko ndabibona. Biragoye cyane kubyakira ariko birimo kuba”.
Tedros, ukomoka muri Tigray, yavuze ko umuryango w’abibumbye (ONU/UN) wasanze hacyenewe imfashanyo y’amakamyo 100 y’ibiribwa buri munsi mu kuramira (kurengera) imibereho y’abatuye muri ako karere.
Mu kwezi kwa cumi na kumwe mu 2020, nyuma y’amezi yari ashize hatutumba ubushyamirane, ni bwo intambara yadutse muri Tigray hagati y’umutwe wa TPLF – w’ishyaka rya TPLF ryamaze hafi imyaka 30 ari ryo ryiganje muri politiki ya Ethiopia – n’ingabo za leta ya Ethiopia.
Iyo mirwano imaze kwicirwamo abantu babarirwa mu bihumbi – barimo n’abaturage b’abasivile – naho abandi babarirwa muri za miliyoni bacyeneye imfashanyo yihutirwa y’ibiribwa, mu gihe leta ya Ethiopia ishinjwa kubangamira ibikorwa byo gutanga imfashanyo.
Bivugwa ko impande zombi ziri mu mirwano zakoze ubwicanyi burenze ku mategeko ndetse zigakora ihohotera rishingiye ku gitsina.
ONU ivuga ko amakuba yo muri Yemen ari yo makuba mu mibereho ya mbere mabi cyane abayeho ku isi kugeza ubu.
Muri Afghanistan, ONU ivuga ko abantu miliyoni 24 bacyeneye imfashanyo y’ibiribwa kugira ngo bashobore gukomeza kubaho.
Syria imaze imyaka 11 iri mu ntambara. Abantu barenga 500,000 barishwe naho abandi babarirwa muri za miliyoni bata ingo zabo kubera iyo ntambara.
Comments are closed.