Ubuzima bw’imyororokere ni kimwe mu bice by’ingenzi bigize imibereho myiza y’umuntu, nyamara, hari igihe ubushake cyangwa ubushobozi bwo gukora imibonano mpuzabitsina bugabanuka bitewe n’indwara cyangwa imiti umuntu aba ari gufata. Ubushakashatsi butandukanye bwagaragaje ko hari imiti imwe n’imwe ikoreshwa cyane ishobora kugira ingaruka ku mikorere y’imyanya ndangagitsina y’abagabo.
Dore imiti itandatu ikoreshwa cyane kandi ishobora kugira izo ngaruka ku bagabo mu gihe cyo gutera akabariro:
1. Imiti igabanya ububabare (Analgésiques), cyane cyane ikoreshwa igihe kirekire
Hari ubwoko bumwe bw’imiti igabanya ububabare bushobora kugabanya umusaruro wa testosterone, bikaba byatera kugabanuka k’ubushake bwo gukora imibonano mpuzabitsina cyangwa ibibazo byo kudashyukwa neza.
2. Imiti ivura umuvuduko ukabije w’amaraso (Antihypertenseurs)
Nubwo ifasha kurinda indwara z’umutima n’imitsi, hari imwe muri iyi miti ishobora kugira ingaruka ku mikorere y’imibonano mpuzabitsina, harimo kugabanya ubushake cyangwa gutera ikibazo cyo kudakora neza kw’igitsina.
3. Imiti ivura agahinda gakabije n’ihungabana (Antidépresseurs)
Iyi miti ikoreshwa cyane mu kuvura indwara zo mu mutwe, ariko bamwe mu bayifata bashobora guhura n’ingaruka zirimo kugabanuka k’ubushake bw’imibonano mpuzabitsina cyangwa kugorwa no kugera ku ndunduro. (Cochrane)
4. Imiti ivura igituntu (Tuberculose)
Hari imiti imwe n’imwe ikoreshwa mu kuvura igituntu ishobora kugira ingaruka ku mikorere y’imibonano mpuzabitsina, nubwo bitabaho kuri buri muntu uyifata.
5. Imiti ifungura amazuru igihe umuntu afite ibicurane cyangwa allergie (Décongestionnants nasaux)
N’ubwo iboneka no mu maduka nta nyandiko ya muganga isabwa, hari igihe ishobora gutera kugabanuka k’ubushake bw’imibonano mpuzabitsina cyangwa ibindi bibazo bifitanye isano n’imikorere y’igitsina.
6. Imiti igabanya cyangwa ibuza imikorere ya testosterone
Iyi ikoreshwa cyane cyane mu kuvura ibibazo bya prostate cyangwa izindi ndwara zimwe na zimwe. Kubera ko igabanya testosterone, ishobora gutuma ubushake n’ubushobozi bw’imibonano mpuzabitsina bigabanuka cyane.
Abaganga bashimangira ko umuntu adakwiye guhagarika imiti yandikiwe na muganga kubera gusa gutinya izi ngaruka. Niba ubona impinduka mu buzima bwawe bw’imibonano mpuzabitsina nyuma yo gutangira gufata umuti runaka, ni byiza kubiganiraho na muganga kugira ngo agire inama cyangwa ahindure uburyo bwo kuvura.
