mibare y’abatahurwaho icyorezo cya COVID-19 mu Rwanda ikomeje gutumbagira mu buryo budasanzwe. mu minsi itatu gusa hamaze gutahurwa abarwayi bashya 2,447 barimo 964 batahuwe mu masaha 24 ashize, 861 ku wa Kabiri n’abandi 622 babonetse ku wa Mbere.
Kubw’iyo mpamvu, Guverinoma y’u Rwanda yafashe ingamba nshya zatangiye kubahirizwa kuri uyu wa Gatatu, aho ingendo zihuza Umujyi wa Kigali n’izindi Ntara ndetse n’izihuza uturere zabaye zihagaritswe mu rwego rwo kwirinda ko abantu bakomeza gukwirakwiza iki cyorezo.
Hagiye gushira ibyumweru bitatu hatahurwa umubare uri hejuru ku buryo budasanzwe, abaturarwanda bakaba basabwa kwitwararika kuko iki cyorezo cyakajije umurego.
Muri rusange abarwayi bakirimo kwitabwaho n’abaganga mu Rwanda bageze ku 6,129 barimo abantu 12 barembye, bakaba ari bo basigaye mu bantu 33,260 bamaze gutahurwa guhera muri Werurwe 2020.
Abamaze gukira baracyari ku 26,734 bangana na 80.3% by’abantu batahuweho icyo cyorezo kugeza uyu munsi, aho mu masaha 24 ashize hakize abarwayi bashya 22.
Uyu munsi COVID-19 yahitanye abantu batanu, bituma abamaze guhitanwa na yo kuva yagera mu Rwanda bagera kuri 397. Abapfuye ni abagabo batatu b’imyaka 70, 65, 63 n’umugore w’imyaka 43 w’i Kigali, hamwe n’umugabo w’imyaka 68 w’i Huye.
Abarwayi bashya barimo abo mu Mujyi wa Kigali 326, Kamonyi 85, Musanze 78, Rubavu 73, Burera 47, Nyanza 38, Gakenke 32, Rulindo 30, Rwamagana 27, Nyamasheke 23, Rutsiro 22, Ngororero 19, Huye 18, Bugesera 18, Karongi 16, Muhanga 16, Nyabihu 15, Nyamagabe 15, Rusizi 14, Gicumbi 11, Ruhango 10, Kayonza 9, Nyagatare 7, Ngoma 6, Kirehe 4, Gatsibo 3, na Nyaruguru 2.
Ibipimo bimaze gufatwa kuva umurwayi wa mbere yatahurwa mu Rwanda ni 1,573,227 birimo 8,741 byafashwe mu masaha 24 ashize.
Uyu munsi, abantu 57 bahawe doze ya mbere y’urukingo rwa COVID-19, bituma abamaze gukingirwa muri rusange bagera ku 391, 058. Ni mu gihe kandi abantu 247,666 bamaze guhabwa doze ya kabiri y’urwo rukingo (AstraZeneca), harimo 264 bayihawe uyu munsi.
Abakingirwa urushimangira barasabwa kwegera ikigo nderabuzima kiri hafi yabo kuko atari ngombwa ko umuntu agorwa no gusubira aho yafatiye urukingo bwa mbere kubera ikoranabuhanga ryifashishijwe mu kubika amakuru.
Kuri ubu, abenshi mu barimo guhabwa doze ya kabiri biganjemo abahawe doze ya mbere y’urukingo rwo mu bwoko bw’Astra Zeneca. Gahunda y’ikingira ya mbere yatangiye nyuma y’iminsi ibiri gusa u Rwanda rwakiriye icyiciro cya mbere cy’inkingo rwemerewe muri gahunda ya COVAX mu ntangiriro za Werurwe 2021.
Abaturarwanda barasabwa kutirara kuko icyorezo cyakajije umurego ndetse hakomeje gufatwa ingamba nshya zigamije gukumira ikwirakwizwa ryacyo, harimo no kwirinda ingendo zitari ngombwa no kwirinda guhurira ahantu hahurira abantu benshi kandi hafunganye.
Kuri ubu haracyubahirizwa amabwiriza yashyiriweho kwirinda. Ingendo hagati y’Umujyi wa Kigali n’Intara, ndetse no hagati y’Uturere dutandukanye tw’Igihugu zirabujijwe.
Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo yabugenewe.
Ku Isi, abamaze kwandura COVID-19 muri rusange bararenga miliyoni 180 barimo abasaga miliyoni 165 bakize ndetse na miliyoni 3.9 z’abantu bamaze kubura ubuzima kubera icyo cyorezo.
Comments are closed.